മന്ത്രി മാത്യൂ ടി തോമസ് രാജി സമർപ്പിച്ചു

തിരുവനന്തപുരം: ജലവിഭവവകുപ്പ് മന്ത്രി മാത്യൂ ടി തോമസ് രാജി വെച്ചു. തിങ്കളാഴ്ച രാവില ക്ലിഫ്ഹൗസിലെത്തിയാണ് മുഖ്യമന്ത്രി പിണറായി വിജയന് രാജി സമര്‍പ്പിച്ചത്. ജനതാദള്‍ (എസ്) നേതൃത്വവുമായുള്ള ധാരണ പ്രകാരമാണ് മാത്യൂ ടി തോമസ് മന്ത്രിസ്ഥാനം ഒഴിയുന്നത്. ചിറ്റൂര്‍ എംഎൽഎയും ജെഡിഎസ് മുതിര്‍ന്ന നേതാവുമായ കെ കൃഷ്ണൻകുട്ടി നാളെ മന്ത്രിയായി സ്ഥാനമേൽക്കും.

ചൊവ്വാഴ്ച വൈകിട്ട് അഞ്ച് മണിയോടെയായിരിക്കും കൃഷ്ണൻകുട്ടി സ്ഥാനമേൽക്കുകയെന്നാണ് വിവരം. ഗവര്‍ണറുടെ സൗകര്യം കൂടി തേടിയ ശേഷമായിരിക്കും ഇക്കാര്യത്തിൽ അന്തിമ തീരുമാനമെടുക്കുക. വകുപ്പുകളിൽ മാറ്റമുണ്ടാകില്ലെന്നാണ് സൂചന.

രാജി തീരുമാനത്തിനു പിന്നാലെ മാത്യൂ ടി തോമസും കെ കൃഷ്ണൻകുട്ടിയും തമ്മിലുള്ള തര്‍ക്കം രൂക്ഷമായിരുന്നു. മാത്യൂ ടി തോമസ് കൊച്ചിയിൽ ബദൽ യോഗം വിളിച്ചു ചേര്‍ക്കുമെന്ന് റിപ്പോര്‍ട്ടുകള്‍ വന്നിരുന്നെങ്കിലും നേതാക്കള്‍ വാര്‍ത്ത നിഷേധിച്ചു.

ഇത് രണ്ടാം തവണയാണ് അഴിമതി ആരോപണങ്ങള്‍ ഒന്നും ഉയരാതെ തന്നെ മാത്യൂ ടി തോമസ് കാലാവധി തീര്‍ക്കാതെ മന്ത്രിക്കസേരയിൽ നിന്ന് പടിയിറങ്ങുന്നത്. മുൻപ് വിഎസ് അച്യുതാനന്ദൻ സര്‍ക്കാരിന്‍റെ കാലത്തും ഗതാഗതവകുപ്പ് മന്ത്രിയായിരുന്ന മാത്യു ടി തോമസ് കാലാവധി തീര്‍ക്കാതെ 2006ൽ സ്ഥാനമൊഴിഞ്ഞിരുന്നു.