തൃപ്പൂണിത്തുറയില്‍ അത്തപതാക ഉയര്‍ന്നു; ഘോഷയാത്ര ഒഴിവാക്കി

തൃപ്പൂണിത്തുറ: ഓണത്തിന് തുടക്കം കുറിച്ച് തൃപ്പൂണിത്തുറ അത്തം നഗറില്‍ പതാകയുയര്‍ന്നു. തൃപ്പൂണിത്തുറ ബോയ്‌സ് ഹൈസ്‌കൂള്‍ ഗ്രൗണ്ടില്‍ ധന്യമന്ത്രി തോമസ് ഐസക്ക് അത്തപതാക ഉയര്‍ത്തി അത്തം ഘോഷയാത്രയുടെ ഔദ്യോഗിക ഉദ്ഘാടനം നിര്‍വ്വഹിച്ചു. കനത്തമഴയെ അവഗണിച്ച് നൂറുകണക്കിനാളുകളാണ് പരിപാടിയില്‍ പങ്കെടുക്കാനായി എത്തിച്ചേര്‍ന്നത്.

ഓണം സമൃദ്ധിയുടെയും സമൃദ്ധമായ നല്ല നാളുകളെ കുറിച്ചുള്ള പ്രതീക്ഷയുടെയും ഉത്സവമാണെന്ന് പറഞ്ഞ ധനകാര്യമന്ത്രി സംസ്ഥാനം നേരിടുന്ന പ്രളയക്കെടുതിയുടെ പശ്ചാത്തലത്തില്‍ ഔദ്യോഗിക ആഘോഷപരിപാടികള്‍ ഒഴിവാക്കുന്നതായി അറിയിച്ചു. ആഘോഷങ്ങള്‍ ഒഴിവാക്കി ദുരിതം നേരിടുന്നതിന് ജനകീയ ഐക്യം രൂപപ്പെടുത്തേണ്ട സന്ദര്‍ഭമാണിതെന്ന് അദ്ദേഹം പറഞ്ഞു.

നാടിന്റെ മഴവെള്ള സംഭരണ ശേഷി ഉയര്‍ത്തുന്നതിനും ജലത്തെ മലിനമാകാതെ സംരക്ഷിക്കാനുമുള്ള കര്‍മ്മപദ്ധതിയിലേക്ക് സര്‍ക്കാര്‍ നീങ്ങുമെന്ന് മന്ത്രി പറഞ്ഞു. ഇതിനായി ജനങ്ങളുടെ യോജിച്ച പ്രവര്‍ത്തനം അനിവാര്യമാണ്. നിപ്പ രോഗബാധയെ തടുക്കാന്‍ കഴിഞ്ഞ കേരളത്തിന് പകര്‍ച്ചവ്യാധി നിയന്ത്രണം സാധ്യമാണെന്ന് മന്ത്രി വ്യക്തമാക്കി. സര്‍ക്കാര്‍ ദുരിതാശ്വാസനിധിയിലേക്ക് തൃപ്പൂണിത്തുറ നഗരസഭ സമാഹരിച്ച തുക നഗരസഭാധ്യക്ഷ ചന്ദ്രികാദേവി മന്ത്രിക്ക് കൈമാറി.