മന്ത്രിസഭാ പുനഃസംഘടന ഉടൻ; ജയരാജൻ തിരിച്ചെത്തിയേക്കും

തിരുവനന്തപുരം: സംസ്ഥാന സര്‍ക്കാര്‍ അഴിച്ചു പണിയാനുള്ള ചര്‍ച്ചകള്‍ സജീവമാക്കാനൊരുങ്ങി സിപിഐഎം. നിലവിൽ അമേിക്കൻ പര്യടനം നടത്തുന്ന മുഖ്യമന്ത്രി പിണറായിവിജൻ തിരിച്ചെത്തുന്നതോടെ ചര്‍ച്ചകള്‍ക്ക് തുടക്കമാകും. ഈ മാസം 19ന് ആരംഭിക്കുന്ന നേതൃയോഗത്തിൽ വിഷയം ചര്‍ച്ചയായേക്കുമെന്നാണ് സൂചന.

ബന്ധുനിയമനം സംബന്ധിച്ച വിവാദത്തിൽ മന്ത്രിസ്ഥാനം നഷ്ടമായ ഇ പി ജയരാജനെ മന്ത്രിസഭയിലേയ്ക്ക് തിരിച്ചെടുക്കാനുള്ള സമ്മര്‍ദ്ദം ശക്തമാണ്. ഫോൺവിളിവിവാദത്തിൽ രാജിവെച്ച ശേഷം മന്ത്രിസഭയിലേയ്ക്ക് തിരിച്ചെത്തിയ ഗതാഗതമന്ത്രി എ കെ ശശീന്ദ്രന് ലഭിച്ച നീതി ജയരാജനും വേണമെന്നാണ് വാദം.

തൃശൂരിൽ നടന്ന സംസ്ഥാനസമ്മേളനത്തിന്‍റെ പൊതുവികാരം മന്ത്രിസഭാ പുനഃസംഘടന വേണമെന്നായിരുന്നു. വിദ്യാഭ്യാസം, ആരോഗ്യം, തദ്ദേശം എന്നീ വകുപ്പുകളുടെ പ്രവര്‍ത്തനത്തെപ്പറ്റിയും സമ്മേളനത്തിൽ വിമര്‍ശനമുയര്‍ന്നു. അതേസമയം, വിദ്യാഭ്യാസവകുപ്പും ആരോഗ്യവകുപ്പും മെച്ചപ്പെട്ട് പ്രതിച്ഛായ ഇതിനോടകം നേടിയിട്ടുണ്ട്. ഏതൊക്കെ മന്ത്രിമാരാണ് മാറേണ്ടത്, ആരെയൊക്കെയാണ് പുതുതായി ഉള്‍പ്പെടുത്തേണ്ടത് എന്നതു സംബന്ധിച്ച് മുഖ്യമന്ത്രിയാണ് അന്തിമതീരുമാനമെടുക്കേണ്ടത്. 21 പേര്‍ക്ക് മന്ത്രിമാരാകാമെങ്കിലും നിലവിൽ 19 മന്ത്രിമാര്‍ മാത്രമാണുള്ളത്.