ചോദ്യം ചെയ്യാന്‍ വിളിപ്പിച്ചത് സത്യം ബോധിപ്പിക്കാനുള്ള സുവര്‍ണാവസരം: മന്ത്രി കെ ടി ജലീല്‍

കൊച്ചി: സ്വര്‍ണക്കടത്ത് കേസുമായി ബന്ധപ്പെട്ട് കസ്റ്റംസ് ചോദ്യം ചെയ്യാന്‍ വിളിപ്പിച്ചത് തന്റെ സത്യം ബോധിപ്പിക്കാനുള്ള സുവര്‍ണാവസരമായി കാണുന്നെന്ന് മന്ത്രി കെ ടി ജലീല്‍. ചോദ്യം ചെയ്യലിന് താന്‍ ഹാജരാകുമെന്ന് മന്ത്രി അറിയിച്ചു.

Also Read: ലൈവ്: നമ്മള്‍ ശത്രുക്കളല്ല, എതിരാളികള്‍ മാത്രം; ട്രംപിനോട് ബൈഡന്‍

തിങ്കളാഴ്ച കസ്റ്റംസ് പ്രിവന്റീവ് ആസ്ഥാനത്ത് ഹാജരാകാനാണ് നിര്‍ദേശം. മതഗ്രന്ഥം വിതരണം ചെയ്ത സംഭവത്തിലാണ് ചോദ്യം ചെയ്യുന്നത്. എന്‍ഐഎയേയും എന്‍ഫോഴ്‌സ്‌മെന്റ് ഡയറക്ടറേറ്റും നേരത്തെ മന്ത്രി ചോദ്യം ചെയ്തിരുന്നു.

അതേസമയം, കസ്റ്റംസ് കഴിഞ്ഞ ദിവസം മന്ത്രിയുടെ ഗണ്‍മാനെ ചോദ്യം ചെയ്തിരുന്നു. ഗണ്‍മാന്റെ ഫോണ്‍ മന്ത്രി ഉപയോഗിച്ചു. സ്വര്‍ണക്കടത്ത് കേസിലെ പ്രതി സരിത്ത് ഗണ്‍മാനെ വിളിച്ചു തുടങ്ങിയ വിവരങ്ങളുടെ അടിസ്ഥാനത്തിലായിരുന്നു ഗണ്‍മാനെ ചോദ്യം ചെയ്തത്.

മന്ത്രി കെ ടി ജലീലിന്റെ ക്ഷണം കേന്ദ്ര ഏജന്‍സികള്‍ സ്വീകരിച്ചിരിക്കുകയാണെന്ന് കെപിസിസി അധ്യക്ഷന്‍ മുല്ലപ്പള്ളി രാമചന്ദ്രന്‍ പ്രതികരിച്ചു. എല്ലാ കേന്ദ്ര ഏജന്‍സികള്‍ക്കും തന്റെ വീട്ടിലേക്ക് സ്വാഗതമെന്ന് കഴിഞ്ഞ ദിവസം കെ ടി ജലീല്‍ പറഞ്ഞിരുന്നു.

Also Read: കേരള ഗവർണർ ആരിഫ് മുഹമ്മദ് ഖാന് കൊവിഡ് സ്ഥിരീകരിച്ചു

4478 കിലോഗ്രാം മതഗ്രന്ഥമാണ് നയതന്ത്ര പാഴ്‌സല്‍ വഴി സംസ്ഥാനത്ത് എത്തിച്ചത്. ഇത് മലപ്പുറത്ത് വിതരണം ചെയ്യുകയും ചെയ്തിരുന്നു. എന്നാല്‍, ഇതില്‍ പ്രോട്ടോക്കോള്‍ ലംഘനം ഉണ്ടായെന്നാണ് കണ്ടെത്തല്‍. നയതന്ത്ര പാഴ്‌സലില്‍ എത്തുന്നവ പുറത്ത് വിതരണം ചെയ്യുന്നത് നിയമപരമല്ലെന്നാണ് കസ്റ്റംസിന്റെ കണ്ടെത്തല്‍. ഈന്തപ്പഴ ഇറക്കുമതിയിലും കസ്റ്റംസ് കേസെടുത്തിരുന്നു.