വ്യാജ പ്രചാരണം നടുത്തുന്നവർക്കെതിരെ കടുത്ത നടപടിയെന്ന് ഐജി

തിരുവനന്തപുരം: സാമൂഹ്യമാധ്യമങ്ങളിലൂടെ ജനങ്ങൾക്കിടയിൽ തെറ്റിധാരണയും ഭീതിയും പരത്തുന്നവർക്കെതിരെ കടുത്ത നടപടി സ്വീകരിക്കുമെന്ന് ദക്ഷിണമേഖല ഐജി മനോജ് എബ്രഹാം. ഇതിന്‍റെ അടിസ്ഥാനത്തില്‍, കുട്ടികളെ തട്ടികൊണ്ടു പോകും എന്ന തരത്തിലുള്ള സന്ദേശം പ്രചരിപ്പിക്കുന്നവർക്ക് അഞ്ചു വര്‍ഷം തടവ് ലഭിക്കാവുന്ന കുറ്റം ചുമത്തി ക്രിമിനല്‍ കേസെടുക്കുമെന്ന് മനോജ് എബ്രഹാം വ്യക്തമാക്കി.

കുട്ടികളെ തട്ടിക്കൊണ്ടുപോകുന്നുവെന്ന വ്യാജ പ്രചാരണം വ്യാപകമായതോടെയാണ് പോലീസിന്‍റെ നീക്കം. ഇത്തരത്തിൽ പ്രചരിപ്പിക്കുന്നവയില്‍ 99 ശതമാനം സന്ദേശങ്ങളും വ്യാജമാണ്. സംശയത്തിന്‍റെ പേരില്‍ അതിക്രമം നടത്തുന്നവർക്കെതിരെയും നടപടി സ്വീകരിക്കുമെന്ന് ഐജി മുന്നറിയിപ്പ് നൽകി.