കേരളത്തിൽ നിന്ന് കാണാതായവരിൽ നിന്ന് ഒരാളെ പിടികൂടി

മുംബൈ: കേരളത്തിൽ നിന്ന് ദുരൂഹസാഹചര്യത്തിൽ കാണാതായവരിൽ ഒരാളെ മുംബൈയിൽ പിടികൂടി. കാസർഗോഡ് ഇളമ്പച്ചി സ്വദേശി ഫിറോസ് ഖാനെയാണ് സെൻട്രൽ ഇന്റലിജൻസ് ഇന്നലെ രാത്രി പിടികൂടിയത്. ഇയാളെ ചോദ്യം ചെയ്‌ത് വരികയാണ്.

ഒരാഴ്‌ച മുമ്പ് ഫിറോസ് വീട്ടിലേക്ക് വിളിച്ചിരുന്നു. ബാക്കിയുള്ളവർ സിറിയയിലുണ്ടെന്ന് ഇയാൾ വീട്ടുകാരോട് പറഞ്ഞിരുന്നു. കാണാതായവരിൽ ചിലർ ഐഎസിൽ ചേർന്നെന്ന് വാർത്തകൾ വരുന്നതിന് മുമ്പായിരുന്നു ഇത്. തുടർന്ന് വീട്ടുകാരിൽ നിന്ന് ‌മൊഴിയെടുത്ത അന്വേഷണ സംഘം ഫോൺ പിന്തുടർന്ന് നടത്തിയ അന്വേഷണത്തിലാണ് ഇയാളെ കണ്ടെത്തിയത്.

ഫിറോസ് ഖാനെ ചോദ്യം ചെയ്‌താൽ കാണാതായ മറ്റുള്ളവരെ കുറിച്ച് വ്യക്തമായ വിവരം ലഭിക്കുമെന്ന് അന്വേഷണ സംഘം അറിയിച്ചു.