പ്രധാനമന്ത്രി കേരളത്തില്‍: ദുരന്തബാധിത പ്രദേശങ്ങള്‍ സന്ദര്‍ശിക്കും

ന്യൂഡല്‍ഹി: കേരളത്തില്‍ കഴിഞ്ഞ കുറച്ചു ദിവസങ്ങളായി തുടരുന്ന പ്രളയക്കെടുതി വിലയിരുത്താന്‍ പ്രധാനമന്ത്രി നരേന്ദ്ര മോദി കേരളത്തില്‍. ശനിയാഴ്ചയാണ് അദ്ദേഹം ദുരിത ബാധിത പ്രദേശങ്ങള്‍ സന്ദര്‍ശിക്കുക. കേരളത്തിലേയ്ക്ക് യാത്ര തുടങ്ങുന്നു എന്നറിയിച്ചുകൊണ്ട് മോദി ട്വീറ്റ് ചെയ്തു.

തിരുവനന്തപുരത്തേക്കാണ് മോദി നേരിട്ട് എത്തുന്നത്. വെള്ളിയാഴ്ച രാജ്ഭവനില്‍ തങ്ങും. ശനിയാഴ്ച രാവിലെ 7.10 മുതല്‍ പത്തനംതിട്ട, ആലപ്പുഴ, റാന്നി, ആലുവ എന്നിവിടങ്ങളില്‍ പ്രളയബാധിത പ്രദേശങ്ങള്‍ അദ്ദേഹം വീക്ഷിക്കും.

മുഖ്യമന്ത്രി പിണറായി വിജയനും പ്രധാനമന്ത്രിയുടെ കൂടെയുണ്ടാവും. തുടര്‍ന്ന് രാവിലെ 9.25-ന് കൊച്ചി നേവല്‍ ബേസില്‍ മുഖ്യമന്ത്രിയുമായി ചര്‍ച്ച നടത്തും. ഈ വേളയില്‍ കേരളത്തിനുള്ള ദുരിതാശ്വാസ പദ്ധതികള്‍ പ്രധാനമന്ത്രി പ്രഖ്യാപിക്കുമെന്നാണ് സംസ്ഥാന സര്‍ക്കാര്‍ പ്രതീക്ഷിക്കുന്നത്.

കേരളത്തെ പ്രളയബാധിതമായി പ്രഖ്യാപിക്കണമെന്ന ആവശ്യവും സര്‍ക്കാര്‍ മുന്നോട്ടു വയ്ക്കും. കൂടിക്കാഴ്ചയ്ക്കു ശേഷം ശനിയാഴ്ച രാവിലെ 10.30-ന് പ്രധാനമന്ത്രി കൊച്ചിയില്‍നിന്നു മടങ്ങും.

പ്രളയക്കെടുതിയില്‍ സംസ്ഥാനത്തിന്‍റെ സ്ഥിതി അതീവ ഗുരുതരമായി തുടരുകയാണെങ്കിലും സമാനതകളില്ലാത്ത രക്ഷാപ്രവര്‍ത്തനമാണ് നടക്കുന്നത്. കേന്ദ്രസേന, പൊലീസ്, ഫയര്‍ഫോഴ്‌‌സ്, മത്സ്യത്തൊഴിലാളികള്‍, സന്നദ്ധപ്രവര്‍ത്തകര്‍ എല്ലാവരും ഒത്തു ചേര്‍ന്നാണ് പ്രാദേശിക രക്ഷാ പ്രവര്‍ത്തനങ്ങള്‍ നടത്തുന്നത്