സമരപ്പന്തലിന് മുന്നിലെ ആത്മഹത്യ വേദനാജനകമെന്ന് മോദി

ന്യൂഡൽഹി: കേരളത്തിലെ ബിജെപി ഹര്‍ത്താലിനും ശബരിമല സമരത്തിനും പിന്തുണയുമായി പ്രധാനമന്ത്രി നരേന്ദ്ര മോദി. ഇന്ന് കേരളത്തിൽ ഹര്‍ത്താൽ പ്രഖ്യാപിക്കാൻ ബിജെപി നിര്‍ബന്ധിതരായതാണെന്ന് മോദി പറഞ്ഞു. കോൺഗ്രസ്, കമ്മ്യൂണിസ്റ്റ് ഭരണകൂടങ്ങള്‍ അഴിമതിയുടെ മാതൃകയാണെന്നും മോദി കുറ്റപ്പെടുത്തി. നമോ ആപ്പ് വഴി ആറ്റിങ്ങൽ, കൊല്ലം, മാവേലിക്കര, പത്തനംതിട്ട, ആലപ്പുഴ മണ്ഡലങ്ങളിലെ പ്രവര്‍ത്തകരുമായി സംവദിക്കുമ്പോഴാണ് മോദി ഇക്കാര്യം പറഞ്ഞത്.

നിയമസഭാ തെരഞ്ഞെടുപ്പുകളിൽ ഹിന്ദി മേഖലയകളിൽ നിന്നുണ്ടായ തിരിച്ചടിയ്ക്ക് ദക്ഷിണമേഖലയിൽ നിന്ന് സമ്പാദിക്കുന്ന പിന്തുണ കൊണ്ട് പരിഹാരമുണ്ടാക്കാനുള്ള ബിജെപിയുടെ ശ്രമങ്ങളുടെ ഭാഗമാണ് പുതിയ പദ്ധതി. ലോക്സഭാ തെരഞ്ഞെടുപ്പിന് മുന്നോടിയായി കേരളത്തിലെ തെരഞ്ഞെടുത്ത മണ്ഡലങ്ങളിൽ നരേന്ദ്ര മോദി പ്രചരണത്തിന് എത്തിയേക്കുമെന്നും സൂചനയുണ്ട്.

കേരളത്തിലെ ഭരണത്തിന്‍റെ കാര്യക്ഷമത കൂട്ടാൻ കോൺഗ്രസ്, കമ്മ്യൂണിസ്റ്റ് ഭരണകൂടങ്ങള്‍ക്കായിട്ടില്ലെന്നും കേരളത്തിൽ ത്രിപുര ആവര്‍ത്തിക്കുന്ന ദിവസം വിദൂരമല്ലെന്നും മോദി അഭിപ്രായപ്പെട്ടു.

തിരുവനന്തപുരത്ത് ബിജെപി സമരപ്പന്തലിന് മുന്നിലുണ്ടായ ആത്മഹത്യ വേദനാജനകമാണെന്ന് മോദി അഭിപ്രായപ്പെട്ടു. പ്രശ്നങ്ങളുണ്ടാകുമ്പോള്‍ ഇത്തരം കടുത്ത നിലപാടുകളിലേയ്ക്ക് കടക്കരുതെന്നും മോദി നിര്‍ദേശം നല്‍കി.