Mohanlal: ചലച്ചിത്ര അവാര്‍ഡില്‍ മുഖ്യാതിഥി മോഹന്‍ലാല്‍

തിരുവനന്തപുരം: നടന്‍ മോഹന്‍ലാല്‍ സംസ്ഥാന ചലച്ചിത്ര പുരസ്‍കാര ദാന ചടങ്ങില്‍ പങ്കെടുക്കുമെന്ന് സാംസ്‍കാരിക വകുപ്പ് മന്ത്രി എ.കെ ബാലന്‍. ബുധനാഴ്‍ച്ച മോഹന്‍ലാലിന് ക്ഷണക്കത്ത് നല്‍കുമെന്നും എ.കെ ബാലന്‍ അറിയച്ചതായി വിവിധ മാധ്യമങ്ങള്‍ റിപ്പോര്‍ട്ട് ചെയ്‍തു.

നടി ആക്രമിക്കപ്പെട്ട കേസുമായി ബന്ധപ്പെട്ട വിവാദങ്ങളില്‍ സിനിമ താരങ്ങളുടെ സംഘടന എ.എം.എം.എ പ്രസിഡന്‍റ് മോഹന്‍ലാല്‍ കടുത്ത വിമര്‍ശനമാണ് നേരിട്ടത്. മോഹന്‍ലാലിനെ ചലച്ചിത്ര പുരസ്‍കാരം നല്‍കാന്‍ ക്ഷണിക്കരുതെന്ന് നൂറിലേറെപ്പേര്‍ ഒപ്പിട്ട ഹര്‍ജി സര്‍ക്കാരിന് ലഭിച്ചിരുന്നതായി റിപ്പോര്‍ട്ടുകളുണ്ടായിരുന്നു. ഇത് മന്ത്രി എ.കെ ബാലന്‍ നിഷേധിച്ചതായി മനോരമഓണ്‍ലൈന്‍ റിപ്പോര്‍ട്ട് ചെയ്‍തു.

"മോഹന്‍ലാലിനെ ക്ഷണിക്കരുതെന്ന് കാണിച്ച് ആരും നിവേദനം നല്‍കിയിട്ടില്ല. മോഹന്‍ലാല്‍ പങ്കെടുത്താല്‍ ചടങ്ങിന് ശോഭ കുറയുമെന്നതില്‍ യുക്തിയില്ല." മന്ത്രി മാധ്യമങ്ങളോട് വ്യക്തമാക്കി.

മോഹന്‍ലാലിന് എതിരെ നല്‍കിയ ഹര്‍ജിയില്‍ നടന്‍ പ്രകാശ് രാജിന്‍റെതായിരുന്നു ആദ്യത്തെ ഒപ്പ്. എന്നാല്‍ ഇത്തരമൊരു ഹര്‍ജിയെക്കുറിച്ച് അറിയില്ലെന്നും ഒപ്പ് വ്യാജമാണെന്നും പ്രകാശ് രാജ് അറിയിച്ചിരുന്നു. ഇതോടെ മോഹന്‍ലാലിന് എതിരെയുള്ള ഹര്‍ജി പരിശോധിക്കണമെന്ന് ആവശ്യം ഉയര്‍ന്നിട്ടുണ്ട്.