നടിമാരെ അവഹേളിക്കരുതെന്ന് മോഹൻലാൽ പറയണം: ജോസഫൈൻ

തിരുവനന്തപുരം: എഎംഎംഎ സംഘടനക്ക് മോഹൻലാൽ നൽകുന്ന നേതൃത്വത്തിൽ പ്രതീക്ഷയില്ലെന്ന് വ്യക്തമാക്കി വനിതാ കമ്മീഷൻ അധ്യക്ഷ എം.സി.ജോസഫൈൻ. സിനിമാ മേഖലയിലെ വനിതകളുടെ കൂട്ടായ്‌മയായ ഡബ്ള്യുസിസി കഴിഞ്ഞ ദിവസം നടത്തിയ വാർത്താ സമ്മേളനത്തിന്റെ പശ്ചാത്തലത്തിലാണ് ജോസഫൈന്റെ പ്രതികരണം.

ആക്രമിക്കപ്പെട്ട നടിയുടെ വിഷയത്തിൽ എഎംഎംഎ സ്വീകരിച്ച നിലപാടിനെ വനിതാ കമ്മീഷൻ അധ്യക്ഷ രൂക്ഷമായി വിമർശിച്ചു. അഭിനേതാക്കളുടെ സംഘടനയിൽ നിന്നും നടിക്ക് നീതി കിട്ടിയില്ല എന്നും ദിലീപിന്റെ അംഗത്വത്തിൽ സംഘടനയുടെ നിലാപാട് എന്താണെന്നുമുള്ള രണ്ട് വിഷയങ്ങളാണ് ഡബ്ള്യുസിസി പ്രധാനമായും ഉന്നയിച്ചത്.

മോഹൻലാൽ എഎംഎംഎയുടെ നേതൃ സ്ഥാനത്തേക്ക് വന്നപ്പോൾ ഉണ്ടായിരുന്ന പ്രതീക്ഷ ഇപ്പോൾ ഇല്ല. ആരാധകരെ നിലക്ക് നിർത്തി മോഹൻലാൽ കുറച്ചു കൂടി ഉത്തരവാദിത്തം കാണിക്കണം. കോടതി വിധി വരുന്നത് വരെ ദിലീപ് നിരപരാധിയായിരിക്കുമെന്നാണ് എഎംഎംഎ ഇന്ന് ഡബ്ള്യുസിസിക്ക് നൽകിയ മറുപടി. നടിമാർക്കെതിരെയുള്ള അവഹേളനം നിർത്തണമെന്ന് മോഹൻലാൽ ഉൾപ്പടെയുള്ള മുതിർന്ന അഭിനേതാക്കൾ ആരാധകരോട് ആവശ്യപ്പെടണമെന്നും ജോസഫൈൻ വ്യക്തമാക്കി.