മൂലമ്പിള്ളി പിഴല പാലം നവംബറില്‍ പൂർത്തിയാക്കും: മന്ത്രി എ.സി. മൊയ്തീൻ

കൊച്ചി : മൂലമ്പിള്ളി - പിഴല പാലം നിർമ്മാണം നവംബർ 30നകം പൂർത്തിയാക്കുമെന്ന് തദ്ദേശസ്വയംഭരണ വകുപ്പ് മന്ത്രി എ.സി. മൊയ്തീൻ പറഞ്ഞു. സ്ഥലം സന്ദർശിച്ച് പാലത്തിന്റെ നിർമ്മാണ പുരോഗതി നേരിട്ട് മന്ത്രിയുടെ സംഘം വിലയിരുത്തി. എസ് ശർമ എംഎൽഎ , ജില്ലാ കളക്ടർ മുഹമ്മദ് വൈ സഫീറുള്ള, ജിഡ ടെക്നിക്കൽ കൺസൾട്ടന്റ് കുര്യൻ മാത്യു , ജിഡ ഉദ്യോഗസ്ഥർ തുടങ്ങിയവർ സംഘത്തിലുണ്ടായിരുന്നു. രാവിലെ ജിഡ ഓഫീസിൽ നടന്ന അവലോകന യോഗത്തിന് ശേഷമാണ് സ്ഥലം സന്ദർശിച്ചത്. യോഗത്തിൽ പാലത്തിന്റെ നിർമ്മാണവുമായി ബന്ധപ്പെട്ട കാര്യങ്ങൾ വിലയിരുത്തി.

പാലത്തിന്റെ 60 സ്പാനിൽ 54 എണ്ണത്തിന്റെയും നിർമ്മാണം പൂർത്തിയായി. യാതൊരു തടസ്സവും കൂടാതെയാണ് നിർമ്മാണ പ്രവർത്തനങ്ങൾ നടക്കുന്നത്. തുടർന്നുള്ള പണികൾ അധികം തൊഴിലാളികളെ ഉപയോഗിച്ച് വേഗത്തിൽ പൂർത്തിയാക്കും. നിർമ്മാണ പ്രവർത്തനങ്ങൾ പുരോഗമിക്കുന്നതിന് ചില സാങ്കേതിക തടസം മാത്രമാണ് നേരിടുന്നത്. അത് ഉടനടി പരിഹരിക്കുമെന്ന് മന്ത്രി പറഞ്ഞു. ജിഡയുടെ കീഴിലുള്ള വിശാലമായ മറ്റ് പ്രോജക്റ്റ്കൾ മുഖ്യമന്ത്രി ചെയർമാനായ കൗൺസിൽ ചർച്ചചെയ്തു തീരുമാനമെടുക്കുമെന്നും അദ്ദേഹം പറഞ്ഞു.

മൂലമ്പിള്ളി - ചാത്തനാട് റോഡ് പദ്ധതിയുടെ ഭാഗമായി ആദ്യ പാദത്തിൽ നിർമ്മിക്കുന്ന മൂലമ്പിള്ളി - പിഴല പാലത്തിന്റെ എൺപത് ശതമാനം പണി ഇത് വരെ പൂർത്തീകരിച്ചു. 607 മീറ്റർ നീളമുള്ള പാലത്തിന് 81.75 കോടി രൂപയാണ് ചെലവ്. രണ്ടാം പാദ പ്രവർത്തനമായ വലിയ കടമക്കുടി - ചാത്തനാട് പാലത്തിന് 52 കോടി രൂപയാണ് ചെലവ്. 75 ശതമാനം പണി ഇത് വരെ പൂർത്തീകരിച്ചു. സ്ഥലമെടുപ്പ് കഴിഞ്ഞാൽ ഉടൻ തന്നെ പണി പൂർത്തീകരിക്കും.