കന്യാസ്ത്രീമാരുടെ സമരം 9-ാം ദിവസം; പിന്തുണയുമായി വൈദികര്‍

കൊച്ചി: ലൈംഗികാരോപണം നേരിടുന്ന ജലന്ധര്‍ ബിഷപ്പ് ഫ്രാങ്കോ മുളയ്ക്കലിന്‍റെ അറസ്റ്റ് ആവശ്യപ്പെട്ട് കന്യാസ്ത്രീകള്‍ നടത്തുന്ന നിരാഹാര സമരം ഒൻപതാം ദിവസത്തിലേയ്ക്ക് കടക്കുമ്പോള്‍ സമരത്തിന് വൈദികരുടെയും വിശ്വാസികളുടെയും പിന്തുണയേറുന്നു. ബിഷപ്പിനെ അറസ്റ്റ് ചെയ്യുംവരെ അനിശ്ചിതകാല നിരാഹാരസമരം തുടരുമന്ന് കന്യാസ്ത്രീകള്‍ വ്യക്തമാക്കി.

നൂറുകണക്കിന് ആളുകളാണ് സമരക്കാര്‍ക്ക് പിന്തുണയര്‍പ്പിച്ച് ഹൈക്കോടതി ജംഗ്ഷനിലെ സമരവേദിയിലേയ്ക്ക് എത്തുന്നത്. ബിഷപ്പ് ഫ്രാങ്കോ സ്ഥാനമൊഴിഞ്ഞാലും സമരം നിര്‍ത്തില്ലെന്ന് കന്യാസ്ത്രീകള്‍ വ്യക്തമാക്കി. വിഎസ് അച്യുതാനന്ദനെപ്പോലുള്ള നേതാക്കള്‍ പിന്തുണയ്ക്കുന്നുണ്ടെങ്കിലും സര്‍ക്കാര്‍ നിലപാട് അനുകൂലമാണെന്ന് കരുതുന്നില്ലെന്നും സമരക്കാര്‍ പറഞ്ഞു.

പരാതിക്കാരിയായ കന്യാസ്ത്രീ പ്രവര്‍ത്തിക്കുന്ന കുറവിലങ്ങാട് മിഷണറീസ് ഓഫ് ജീസസ് മഠത്തിലെ കന്യാസ്ത്രീകളായ അനുപമ, ആൽഫി, ജോസഫൈൻ, അൻസിറ്റ എന്നിവരാണ് തുടര്‍ച്ചയായി സമരത്തിലുള്ളത്. ഇവര്‍ക്ക് പുറമെ ക്രിസ്റ്റ്യൻ റവല്യൂഷണറി മൂവ്മെന്‍റ് അംഗം അലോഷ്യ ജോസഫ് കൂടി സമരത്തിൽ പങ്കുചേര്‍ന്നിട്ടുണ്ട്.

സമരത്തിനു പിന്തുണയര്‍പ്പിച്ച് സീറോ മലബാര്‍ സഭാ മുൻ വക്താവ് ഫാ. പോള്‍ തേലക്കാട്ടിന്‍റെ നേതൃത്വത്തിൽ അതിരൂപതയിലെ എട്ടു വൈദികരും സമരവേദിയിലെത്തി. ഇവര്‍ക്കു പുറമെ മാര്‍ത്തോമാ സഭയിലെ വൈദികരും പിന്തുണയുമായി എത്തി. കേസിൽ വത്തിക്കാൻ ഇടപെടണമെന്നും സഭയിലെ അധികാരത്തിന്‍റെ രോഗലക്ഷണങ്ങള്‍ പരിഹരിക്കണമെന്നും ഫാ. പോള്‍ തേലക്കാട്ടിൽ ആവശ്യപ്പെട്ടു.

ഇവര്‍ക്കു പുറമെ വിവിധ ക്രൈസ്തവസംഘടനകളുടെ പ്രതിനിധികളും കന്യാസ്ത്രീകളും സമരവേദിയിലെത്തി. പ്രക്ഷോഭത്തോടനുബന്ധിച്ച് ശനിയാഴ്ച വൈകിട്ട് നിൽപ്പുസമരവും സംഘടിപ്പിച്ചു. കന്യാസ്ത്രീമാരുടെ സമരത്തിനെതിരെ കെസിബിസി ഇറക്കിയ സര്‍ക്കുലര്‍ ആര്‍ച്ച് ഡയസിൻ മൂവ്മെന്‍റ് ഫോര്‍ ട്രാൻസ്പെരൻസി പ്രവര്‍ത്തകര്‍ കത്തിച്ചു.

സമരം സംസ്ഥാനമൊട്ടാകെ വ്യാപിപ്പിക്കുന്നത് സംബന്ധിച്ച് വിവിധ സംഘടനകളുമായി സമരപ്പന്തലിൽ ചര്‍ച്ച നടത്തും. പിന്തുണയുമായി കൂടുതൽ സ്ത്രീകള്‍ രംഗത്തെത്തുന്ന സാഹചര്യത്തിൽ സ്ത്രീകളുടെ നേതൃത്വത്തിൽ പ്രത്യേക സമരം നടത്തുന്നത് പരിഗണിക്കുന്നുണ്ടെന്നും സേവ് ഔവര്‍ സിസ്റ്റേഴ്സ് ആക്ഷൻ കൗൺസിൽ കൺവീനര്‍ ഫാ. അഗസ്റ്റിൻ വട്ടോളി അറിയിച്ചു.

സമരത്തിന്‍റെ വരവു ചെലവുകള്‍ പുറത്തുവിടുമെന്നും ഇതിനൊപ്പം ബിഷപ്പ് ഫ്രാങ്കോയുടെ സ്വത്തുവിവരങ്ങള്‍ വെളിപ്പെടുത്തണമെന്നും ആക്ഷൻ കൗൺസിൽ ആവശ്യപ്പെട്ടു.