കേരളത്തിലെ ഏറ്റവും മലിനമായ പുഴ പെരിയാർ

തിരുവനന്തപുരം: കേരളത്തിലെ ഏറ്റവും കൂടുതൽ മലിനമായ പുഴ പെരിയാറാണെന്ന് റിപ്പോർട്ട്. പമ്പയാണ് രണ്ടാം സ്ഥാനത്ത്. സെന്‍റര്‍ ഫോര്‍ വാട്ടര്‍ റിസോഴ്‍സസ് ഡവലപ്‍മെന്‍റ് ആന്‍ഡ് മാനേജ്‍മെന്‍റ് നടത്തിയ പഠനത്തിലെ വിശദമായ വിവരങ്ങൾ സർക്കാരിന് സമർപ്പിച്ചിട്ടുണ്ട്.

മീനച്ചലാറും കല്ലായിപ്പുഴയും മൂന്നും നാലും സ്ഥാനങ്ങളിലുണ്ട്. കേരളത്തിലെ പുഴകളുടെ ഗുണനിലവാരത്തെ കുറിച്ചാണ് സെന്‍റര്‍ ഫോര്‍ വാട്ടര്‍ റിസോഴ്‍സസ് ഡവലപ്‍മെന്‍റ് ആന്‍ഡ് മാനേജ്‍മെന്‍റ് പഠനം നടത്തിയത്. റിപ്പോർട്ടിൽ അഞ്ചാം സ്ഥാനം കരമാനയാറിനാണ്. കോളിഫോം ബാക്ടീരിയയുടെ സാന്നിധ്യം, രാസമാലിന്യങ്ങൾ, വെള്ളത്തിലെ ഓക്‌സിജന്‍റെ അളവ് എന്നിവ പരിശോധിച്ചാണ് വിശദമായ റിപ്പോർട്ട് സർക്കാരിന് സമർപ്പിച്ചത്. ജല ഗുണനിലവാര ഇൻഡക്‌സ് 90ൽ കൂടുതലാണെങ്കിൽ മാത്രമേ ശുദ്ധ ജലമെന്ന് പറയാൻ കഴിയൂ. എന്നാൽ കേരളത്തിലെ മിക്ക പുഴകളുടെയും ഗുണനിലവാര ഇൻഡക്‌സ് 45ലും താഴെയാണെന്ന് പഠനം തെളിയിക്കുന്നു.