കാസര്‍കോട് മൂന്നുവയസുകാരനെയും അമ്മയെയും തട്ടിക്കൊണ്ടു പോയി

ചിറ്റാരിക്കൽ: കാസര്‍കോട് ചിറ്റാരിക്കലിൽ അമ്മയെയും മൂന്നുവയസുകാരനായ മകനെയും തട്ടിക്കൊണ്ടു പോയതായി റിപ്പോര്‍ട്ട്. വെള്ളയടുക്കത്ത് ബൈക്ക് മെക്കാനിക്കായ മനുവിന്‍റെ ഭാര്യ നീനു (22), മകൻ സായികൃഷ്ണ എന്നിവരെയാണ് കാണാതായത്.

രാവിലെ പത്ത് മണിയോടെ വീട്ടിൽ നിന്ന് ഇരുവരെയും കാണാതായതായാണ് മനു പോലീസിൽ നല്‍കിയ പരാതിയിൽ പറയുന്നത്. മനു രാവിലെ ജോലിസ്ഥലത്തേയ്ക്ക് പോയിക്കഴിഞ്ഞായിരുന്നു സംഭവം. ഫോണിൽ വിളിച്ചപ്പോള്‍ വീട്ടിൽ ആക്രിക്കച്ചവടക്കാരെത്തിയിട്ടുണ്ടെന്ന് നീനു മനുവിനെ അറിയിച്ചിരുന്നു. തുടര്‍ന്ന് വീട്ടിലെത്തിയപ്പോള്‍ നീനുവിനെയും മകനെയും കാണാനില്ലെന്നാണ് മനു പോലീസിന് നല്‍കിയ മൊഴി.

വീടിനുള്ളിൽ പാത്രങ്ങളും ഭക്ഷണവും മറ്റും ചിതറിക്കിടക്കുന്ന നിലയിലാണ്. ജില്ലാ പോലീസ് മേധാവി ഉള്‍പ്പെടെയുള്ള പോലീസ് ഉദ്യോഗസ്ഥര്‍ സ്ഥലത്തെത്തി പ്രാഥമിക പരിശോധന നടത്തി. കാഞ്ഞങ്ങാട് ഡിവൈഎസ്‍‍പിയുടെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിക്കുന്നത്. നീനുവിന്‍റെ ഫോണിലേയ്ക്ക് വന്ന കോളുകള്‍ കേന്ദ്രീകരിച്ച് നടക്കുന്ന അന്വേഷണമാണ് പ്രധാനമായും നടക്കുന്നത്.