നവജാതശിശുവിന്‍റെ മൃതദേഹം കണ്ടെത്തി; അമ്മ കസ്റ്റഡിയിൽ

ചാരുംമൂട്: ആലപ്പുഴയിൽ നവജാതശിശുവിന്‍റെ മൃതദേഹം ദുരൂഹസാഹചര്യത്തിൽ കണ്ടെത്തി. കുട്ടിയുടെ അമ്മയായ ഇടപ്പോൺ സ്വദേശിനിയായ യുവതി പോലീസ് കസ്റ്റഡിയിൽ ഇവര്‍ മാവേലിക്കരയിലെ ആശുപത്രിയിൽ കഴിയുകയാണ്.

ഞായറാഴ്ച രാവിലെ 10 മണിയോടെയാണ് യുവതി പ്രസവിച്ചതെന്നാണ് റിപ്പോര്‍ട്ട്. അമിതരക്തസ്രാവം ഉണ്ടായതിനെത്തുടര്‍ന്ന് പ്രദേശത്തെ ആശ പ്രവര്‍ത്തകയെ വിളിച്ചു തന്നെ ആശുപത്രിയിൽ എത്തിക്കണമെന്ന് ആവശ്യപ്പെടുകയായിരുന്നു. ഇവരെ ആശുപത്രിയിലേയ്ക്ക് കൊണ്ടുപോകുന്നതിനിടെ പ്ലാസ്റ്റിക് കവറിൽ തുണിയിൽ പൊതിഞ്ഞ നിലയിൽ കുഞ്ഞിന്‍റെ മൃതദേഹം കണ്ടെത്തുകയായിരുന്നു. മാവേലിക്കര ജില്ലാ ആശുപത്രിയിൽ എത്തിച്ച് പരിശോധിച്ചപ്പോള്‍ മരണത്തിൽ അസ്വാഭാവികത തോന്നിയപ്പോള്‍ പോലീസിൽ അറിയിക്കുകയായിരുന്നു.

പ്രസവത്തിൽ കുഞ്ഞ് മരിച്ചെന്ന് യുവതി ആദ്യം പറഞ്ഞെങ്കിലും കൊലപ്പെടുത്തിയതാണെന്ന് പിന്നീട് മൊഴി നല്‍കി. അസ്വാഭാവിക മരണത്തിൽ യുവതിയ്ക്കെതിരെ നൂറനാട് പോലീസ് കേസെടുത്തിട്ടുണ്ട്. ഇവര്‍ പോലീസ് നിരീക്ഷണത്തിലാണ്. എന്നാൽ നാളെ പോസ്റ്റ്മോര്‍ട്ടത്തിന് ശേഷം മാത്രമേ കൊലപാതകമാണോ എന്ന് ഉറപ്പിക്കാനാകൂ.