മുല്ലപ്പെരിയാർ തുറന്നു വിടില്ലെന്ന് കെഎസ്ഇബി ചെയർമാൻ

തിരുവനന്തപുരം: ഇടുക്കി ഡാമിൽ നിന്ന് ഒഴുക്കി വിടുന്ന ജലത്തിന്റെ അളവ് ജലനിരപ്പ് കുറയുന്നത് അനുസരിച്ച് കുറക്കുമെന്ന് കെഎസ്ഇബി ചെയർമാൻ എൻ.ഇ.പിള്ള. ഇടുക്കി ഡാമിലെ ജലനിരപ്പ് 2397 അടിയെത്തുമ്പോൾ വെള്ളത്തിന്റെ അളവ് നിയന്ത്രിക്കും. നീരൊഴുക്ക് എങ്ങനെ വന്നാലും അത് നിയന്ത്രിക്കാൻ കെഎസ്ഇബി സജ്ജമാണെന്നും ചെയർമാൻ അറിയിച്ചു.

ഇടുക്കി ഡാമിലെ ജലനിരപ്പ് 2397 അടിയിലെത്തിയാൽ പുറത്തേക്ക് വിടുന്ന ജലത്തിന്റെ അളവ് സെക്കന്‍‍ഡില്‍ 300 ക്യുമെക്സ് ആയി കുറക്കും. ഡാമിലേക്കുള്ള ശരാശരി ഒഴുക്ക് 500 ക്യുമെക്‌സും പുറത്തേക്ക് ഇപ്പോൾ വിടുന്നത് 750 ക്യുമെക്‌സ് വെള്ളവുമാണ്. അതിനിടെ, തുടർച്ചയായ മഴ കാരണം പമ്പയിൽ ജലനിരപ്പ് ഉയർന്നു. പമ്പയുടെ തീരത്തുള്ളവർ ജാഗ്രത പാലിക്കണമെന്ന് ജില്ലാ കളക്ടർ നിർദേശം നൽകിയിട്ടുണ്ട്. ശബരിഗിരി പദ്ധതിയിലെ പമ്പ, ആനത്തോട് ഡാമുകൾ തുറന്നു വിട്ടതോടെയാണ് പമ്പയിൽ ജലനിരപ്പ് ഉയർന്നത്. തുടർന്ന്, ശബരിമല തീർഥാടകർക്ക് വിലക്കേർപ്പെടുത്തി. മഴയെ തുടർന്ന് പാലക്കാട് ജില്ലയിലെ വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചിട്ടുണ്ട്.