കേന്ദ്രം കുനിയാൻ പറഞ്ഞാൽ മുട്ടിൽ ഇഴയുന്ന മുഖ്യമന്ത്രിയാണ് പിണറായി: മുല്ലപ്പള്ളി

ലാവ്ലിൻ കേസും സിബിഐയും ഉപയോഗിച്ച് ബിജെപിയും കേന്ദ്രസർക്കാരും മുഖ്യമന്ത്രി പിണറായി വിജയനെ ബ്ലാക്ക്മെയിൽ ചെയ്യുകയാണെന്ന് കെപിസിസി പ്രസിഡന്റ് മുല്ലപ്പള്ളി രാമചന്ദ്രൻ. ഉദ്ഘാടനത്തിനു മുമ്പ് ബിജെപി ദേശീയ അദ്ധ്യക്ഷൻ അമിത് ഷായ്ക്ക് കണ്ണൂർ വിമാനത്താവളത്തിൽ വന്നിറങ്ങാൻ അനുമതി കൊടുത്തത് പിണറായി വിജയനാണെന്നും മുല്ലപ്പള്ളി പറഞ്ഞു.

പിണറായി വിജയൻ അധികാരമേറ്റ നാൾ മുതൽ പ്രധാനമന്ത്രി നരേന്ദ്രമോദിയെ സ്തുതിക്കുന്നത് ലാവ്ലിൻ കേസുപയോഗിച്ചുള്ള ബ്ലാക്ക്മെയിലിങ്ങിന്റെ ഭാഗമാണെന്നും മുല്ലപ്പള്ളി ആരോപിച്ചു. കേന്ദ്രം കുനിയാൻ പറഞ്ഞാൽ മുട്ടിൽ ഇഴയുന്ന മുഖ്യമന്ത്രിയാണ് പിണറായിയെന്നും മുല്ലപ്പള്ളി പരിഹസിച്ചു. കണ്ണൂർ വിമാനത്താവളത്തിൽ വന്നിറങ്ങിയ ശേഷം അമിത്ഷാ ഇടതു സർക്കാരിനെതിരെ ഭീഷണിയും വെല്ലുവിളിയും മുഴക്കുകയാണ് ചെയ്തത്.

ഇടതുസർക്കാർ സമ്പൂർണ്ണ പരാജയമാണെങ്കിലും അതിനെ പിരിച്ചുവിടാനുള്ള ബിജെപി ഭീഷണി വിലപ്പോവില്ലെന്നും മുല്ലപ്പള്ളി പറഞ്ഞു. ഉമ്മൻ ചാണ്ടി 99 ശതമാനവും പൂർത്തിയാക്കിയ വിമാനത്താവളത്തിന്റെ പ്രവർത്തി ഇടതുസർക്കാർ അധികാരത്തിലേറ്റശേഷം ഇഴഞ്ഞു നീങ്ങുകയാണെന്നും അദ്ദേഹം ആരോപിച്ചു. കണ്ണൂർ വിമാനത്താവളം ഇനിയും തുറക്കാൻ വൈകുന്നതിൽ ഇടതുസർക്കാർ മറുപടി പറയേണ്ടിവരുമെന്നും മുല്ലപ്പള്ളി പറഞ്ഞു. വിമാനത്താവളത്തിന്റെപേരിൽ ഇടതുസർക്കാരിന് അഭിമാനിക്കാൻ ഒന്നുംമില്ലെന്നും മുല്ലപ്പള്ളി കൂട്ടിച്ചേർത്തു.