യുവ എംഎല്‍എമാര്‍ക്ക് മുല്ലപ്പള്ളിയുടെ പരസ്യശാസന

തിരുവനന്തപുരം: കോണ്‍ഗ്രസിലെ യുവ എംഎല്‍എമാരെ പരസ്യമായി വിമര്‍ശിച്ച് കെപിസിസി പ്രസിഡണ്ട് മുല്ലപ്പള്ളി രാമചന്ദ്രന്‍. കെപിസിസി സംഘടിപ്പിച്ച രാജ്ഭവന്‍ മാര്‍ച്ചില്‍ പങ്കെടുക്കാത്ത എംഎല്‍എമാരെയാണ് മുല്ലപ്പള്ളി രാമചന്ദ്രന്‍ രൂക്ഷമായ ഭാഷയില്‍ വിമര്‍ശിച്ചത്. ആരും പാര്‍ട്ടിക്ക് അതീതരല്ലെന്നും ആരെയും ചുമന്ന് നടക്കേണ്ട ബാധ്യത കോണ്‍ഗ്രസിനില്ലെന്നും മുല്ലപ്പള്ളി തുറന്നടിച്ചു.

കേരളത്തിലെ പാര്‍ട്ടിയുടെ പ്രവര്‍ത്തനങ്ങളും പ്രവര്‍ത്തകരെയും കേന്ദ്രനേതൃത്വം സൂക്ഷ്മമായി നിരീക്ഷിക്കുന്നുണ്ട്. നാവായിക്കുളം ഉപതിരഞ്ഞെടുപ്പില്‍ പാര്‍ട്ടി മൂന്നാം സ്ഥാനത്തേക്ക് പിന്തള്ളപ്പെട്ടതില്‍ എഐസിസി വിശദീകരണം ആവശ്യപ്പെട്ടത് ഇതിന്‍റെ ഭാഗമായിട്ടാണെന്നും മുല്ലപ്പള്ളി വിശദീകരിച്ചു. ഈ മാസം പതിനഞ്ചിന് നടക്കുന്ന പാര്‍ട്ടി സമ്മേളനത്തില്‍ ആത്മാഭിമാനമുള്ള പ്രവര്‍ത്തകര്‍ പങ്കെടുക്കുമെന്നും അദ്ദേഹം പറഞ്ഞു.