മകളുടെ കാമുകനെ കൊല്ലാൻ ശ്രമം: അമ്മയ്‌ക്കും മകനും ജാമ്യമില്ലാ കേസ്

കൊല്ലം: മകളുടെ കാമുകനെ കാറിടിപ്പിച്ച് കൊല്ലാൻ ശ്രമിച്ച അമ്മയ്‌ക്കും സഹോദരനുമെതിരെ പോലീസ് ജാമ്യമില്ലാ വകുപ്പ് ചുമത്തി കേസെടുത്തു. പുനലൂർ സ്വദേശി സൂസൻ എബ്രഹാം, മകൻ അഭയ് എന്നിവർക്കെതിരെയാണ് കേസ്. ഇവരെ ഇന്ന് കോടതിയിൽ ഹാജരാക്കും.

ഇന്നലെ രാവിലെ 10.30-ഓടെ ചെങ്ങമനാട് ആരോമ ജംഗ്ഷനുസമീപമായിരുന്നു സംഭവം. രാവിലെ മകൾ കാമുകനൊപ്പം ബൈക്കിൽ പോകുന്നത് കണ്ട അമ്മയും സഹോദരനും ഇവരെ കാറിൽ പിന്തുടർന്നു. ബൈക്കിൽ നിന്ന് മകൾ ഇറങ്ങിയശേഷം ഇവർ യുവാവിന്റെ ബൈക്ക് ഇടിച്ച് വീഴ്‌ത്തുകയായിരുന്നു.

തുടർന്ന് കാറിൽ നിന്നിറങ്ങി വീണുകിടന്ന യുവാവിനെ ഇവർ മർദ്ദിക്കുകയും ചെയ്‌തു. ഇതുകണ്ട നാട്ടുകാർ പോലീസിനെ വിവരമറിയിക്കുകയായിരുന്നു.

പരിക്കേറ്റ പോൾ മാത്യു കൊട്ടാരക്കര താലൂക്ക് ആശുപത്രിയിൽ ചികിത്സയിലാണ്.