കൊച്ചി: പെണ്കുട്ടികള് മുഖം മറയ്ക്കുന്ന വസ്ത്രം ധരിച്ച് കോളേജില് വരരുതെന്ന് മുസ്ലീം എജ്യുക്കേഷന് സൊസൈറ്റി സര്ക്കുലര്. എംഇഎസ് ഉടമസ്ഥതയിലുള്ള കോളേജുകളില് നിയമം നടപ്പാക്കും. മതമൗലിക വാദത്തിന് എതിരെയാണ് നിലപാട് എന്നാണ് എംഇഎസ് നിലപാട്. ഹൈക്കോടതി ഉത്തരവിനെ അധീകരിച്ചാണ് സര്ക്കുലര് ഇറക്കിയതെന്നും നിയമം നടപ്പാക്കുമെന്നും എംഇഎസ് അധ്യക്ഷന് ഫസല് ഗഫൂര് പറഞ്ഞു.
സ്വന്തം സ്ഥാപനത്തില് നടപ്പാക്കുന്ന വസ്ത്രധാരണ കോഡ് ആണിതെന്നും എതിര്പ്പുള്ളവര്ക്ക് കോടതിയെ സമീപിക്കാം എന്നുമാണ് എംഇഎസ് നിലപാട്. സഭ്യമായി വസ്ത്രം ധരിക്കണം, മുഖം മറയ്ക്കരുത് എന്നീ രണ്ട് കാര്യങ്ങള് മാത്രമാണ് സര്ക്കുലറിലുള്ളത്. ഇതില് വിവാദ വിഷയങ്ങളൊന്നുമില്ലെന്നും ഫസല് ഗഫൂര് മാധ്യമങ്ങളോട് പറഞ്ഞു.
250 പേര് കൊല്ലപ്പെട്ട ചാവേര് ആക്രമണത്തിന് ശേഷം ശ്രീലങ്ക പൊതുസുരക്ഷ മുന്നിര്ത്തി മുഖാവരണം നിരോധിച്ചിരുന്നു. ഇസ്ലാമിക തീവ്രവാദി സംഘടനയാണ് ശ്രീലങ്കയില് എട്ടിടങ്ങളിലായി ഈസ്റ്റര് ദിനത്തില് സ്ഫോടന പരമ്പര നടത്തിയത്. ചാവേറുകളില് ഒരു വനിതയും ഉണ്ടായിരുന്നു.
ശ്രീലങ്ക മുഖാവരണം വിലക്കിയ നടപടിക്ക് ശേഷം ഇന്ത്യയില് തീവ്രഹിന്ദുത്വ സംഘടന ഹിന്ദുസേനയും സമാനമായ ആവശ്യം മുന്നോട്ടുവച്ചിരുന്നു. സുരക്ഷാഭീഷണി മുന്നില്ക്കണ്ട് മുഖാവരണം പൊതുസ്ഥലങ്ങളിലും ഇന്ത്യന് എംബസികളിലും ഒഴിവാക്കാന് ഉത്തരവ് ഇറക്കണമെന്ന് കാണിച്ച് ആഭ്യന്തര മന്ത്രാലയത്തിന് ഇവര് കത്ത് നല്കുകയും ചെയ്തു.
മറ്റൊരു തീവ്ര ഹിന്ദുത്വ രാഷ്ട്രീയ പാര്ട്ടി ശിവസേനയും സമാനമായ ആവശ്യം ഉന്നയിച്ചിരുന്നു.