മന്ത്രി കെടി ജലീലിന്റെ വാട്സാപ്പ് മുസ്ലിം ലീഗ് ഐടി സെൽ ചോർത്തി; വെളിപ്പെടുത്തലുമായി പ്രവർത്തകൻ

തിരുവനന്തപുരം: മന്ത്രി കെടി ജലീലിന്റെ വാട്സാപ്പ് തങ്ങൾ ചോർത്തിയെന്ന വെളിപ്പെടുത്തലുമായി മുസ്ലിം ലീഗ് പ്രവർത്തകൻ യാസിർ എടപ്പാൾ. മീഡിയ വൺ ചാനലിലാണ് യാസിർ ഇക്കാര്യം വെളിപ്പെടുത്തിയത്. മറ്റൊരു ചാനലിനോടും പറയാത്ത കാര്യം പറയാം എന്നു പറഞ്ഞുകൊണ്ടാണ് ഇയാൾ വെളിപ്പെടുത്തൽ നടത്തിയത്.

യാസിർ പറഞ്ഞത് ഇങ്ങനെ

"ഒന്ന് രണ്ട് മാസങ്ങൾക്കു മുമ്പ് കെടി ജലീലിന്റെ വാട്സാപ്പ് ഞങ്ങളുടെ ഐടി സെൽ ഹാക്ക് ചെയ്തു. അതിൽ നിന്നും കെഎംസിസിയെ അപകീർത്തിപ്പെടുത്തുന്ന രണ്ടു മൂന്ന് വോയിസ് ക്ലിപ്പുകൾ ലീക്ക് ചെയ്ത് പബ്ലിക്കിന്റെ ഇടയിൽ വരുത്തിയിരുന്നു."

Also Read: കുമ്മനത്തിനെതിരെ സാമ്പത്തിക തട്ടിപ്പ് കേസ്; 28.75 ലക്ഷം രൂപ തട്ടിച്ചെന്ന് പരാതി

"ഒരു ഫ്ലൈറ്റിന്റെ അനുമതി നിഷേധിക്കപ്പെട്ടപ്പോൾ കെടി ജലീൽ അതിനെ പരിഹസിച്ചുകൊണ്ട് ഒരാൾക്ക് പേഴ്സണലായി അയച്ച ഒരു വോയിസ് ക്ലിപ്പാണ് ചോർത്തിയത്. കെഎംസിസിയുടെ ഫ്ലൈറ്റ് പൊക്കാൻ എസ്ടിയു എന്ന് പറയുന്ന മുസ്ലിം ലീഗിന്റെ തൊഴിലാളി സംഘടന അവിടെ ഉണ്ടായിരുന്നില്ലേ? എന്നാണ് അദ്ദേഹത്തിന്റെ വോയിസ് ക്ലിപ്പിൽ പറഞ്ഞിരുന്നത്."

"ഹാക്ക് ചെയ്തത് നിയമവിരുദ്ധമായ പ്രവർത്തിയാണെന്ന് ഞങ്ങൾക്ക് അറിയാം. അത് ചെയ്തത് ഞാനല്ല. അതിന്റെ നിയമപരമായ ഉത്തരവാദിത്വം എന്നിലേക്ക് വരില്ല. അത് യുഎഇയിൽ നിന്നല്ല ചെയ്തിട്ടുള്ളത്."

Also Read: 'ശിവശങ്കർ പ്രതിയല്ല, അറസ്‌റ്റ് നടപടികൾ കോടതിയെ അറിയിക്കുമെന്ന് എൻഐഎ'; ജാമ്യഹര്‍ജി തീര്‍പ്പാക്കി

മന്ത്രി കെടി ജലീലിനെതിരെ ആരോപണം ഉന്നയിച്ച് യാസിർ എടപ്പാൾ രംഗത്തെത്തിയിരുന്നു. മന്ത്രി അധികാരം ദുർവിനോയോഗം ചെയ്തുവെന്നും തന്റെ വീട് റെയ്ഡ് ചെയ്യിച്ചുവെന്നും വ്യക്തികളെ ഇല്ലായ്മ ചെയ്യാൻ കള്ളക്കടത്തുകാരെയും കൊള്ളക്കാരെയും മന്ത്രി കൂട്ടുപിടിക്കുകയായിരുന്നുവെന്നുമാണ് യാസിർ ആരോപിച്ചത്.

മന്ത്രിക്കെതിരെ സോഷ്യൽ മീഡിയയിൽ പോസ്റ്റിട്ട മലയാളിയായ യുവാവിനെ നാടുകടത്തിച്ച് നാട്ടിലെത്തിക്കാൻ യുഎഇ കോൺസുലേറ്റിന്റെ സഹായം കെടി ജലീൽ തേടിയെന്ന സ്വപ്നയുടെ മൊഴിക്ക് പിന്നാലെയാണ് യാസിർ എടപ്പാൾ ആരോപണവുമായി രംഗത്തെത്തിയത്.