ഇ.അഹമ്മദിന്‍റെ മരണത്തിൽ അന്വേഷണം: മുസ്ലിം ലീഗ് പിന്മാറുന്നു

കോഴിക്കോട്: മുൻ കേന്ദ്രമന്ത്രി ഇ.അഹമ്മദിന്റെ മരണത്തിൽ അന്വേഷണം വേണമെന്നും കുറ്റക്കാരെ ശിക്ഷിക്കണമെന്നുമുള്ള ആവശ്യത്തിൽ നിന്ന് മുസ്ലിം ലീഗ് പിന്മാറുന്നു. പാർലമെന്റിൽ കുഴഞ്ഞു വീണ അഹമ്മദിനെ റാം മനോഹർ ലോഹ്യ ആശുപത്രിയിൽ പ്രവേശിപ്പിച്ചിരുന്നു. ആശുപത്രിയിൽ വെച്ചാണ് ഇ.അഹമ്മദ് മരിച്ചത്.

കേന്ദ്ര സർക്കാർ പാർലമെന്റ് കൂടുന്നത് തടസപ്പെടാതിരിക്കാൻ ഇ.അഹമ്മദിന്റെ മരണ വിവരം മറച്ചു വെച്ചെന്നും റാം മനോഹർ ലോഹ്യ ആശുപത്രി അധികൃതർ ഇതിന് കൂട്ട് നിന്നെന്നുമായിരുന്നു ലീഗ് ആരോപണം.മുസ്ലിം ലീഗും ഇ.അഹമ്മദിന്റെ കുടുംബവും അന്വേഷണം വേണമെന്ന ആവശ്യം മുന്നോട്ട് വെച്ചിരുന്നു. കേന്ദ്ര സർക്കാരിന്റെ താല്പര്യം ആശുപത്രി അധികൃതർ സംരക്ഷിക്കുകയായിരുന്നു എന്നാണ് ഉയർന്ന ആരോപണം.

പാർട്ടി മുൻ ദേശീയ അധ്യക്ഷനായിരുന്ന ഇ. അഹമ്മദിന്റെ മരണത്തിൽ അന്വേഷണം വേണമെന്ന ആവശ്യത്തിൽ നിന്ന് പിന്മാറുന്നതായി പി.കെ.കുഞ്ഞാലിക്കുട്ടിയാണ് അറിയിച്ചത്. കുഞ്ഞിക്കുട്ടി നടത്തിയ അറിയിപ്പിനോട് ചില പാർട്ടി പ്രവർത്തകർക്കും ഇ.അഹമ്മദിന്റെ കുടുംബത്തിനും എതിർപ്പുണ്ട്. ബജറ്റ് സമ്മേളനത്തിനിടെ ഇ.അഹമ്മദ് കുഴഞ്ഞു വീണ ശേഷം സമ്മേളനം തടസപ്പെടാതിരിക്കാനാണ് മരണ വിവരം വൈകി അറിയിച്ചതെന്ന് അന്ന് ലീഗ് ആരോപിച്ചിരുന്നു.