ലീഗിന്റെ പ്രാകൃത ഊര് വിലക്കിനെതിരെ എംവി ജയരാജന്‍

ബത്തേരി: സോഷ്യല്‍ മീഡിയയിലൂടെ പാണക്കാട് ഹൈദരാലി സിഹാബ് തങ്ങളെ വിമര്‍ശിച്ച സിപിഎം പ്രവര്‍ത്തകന് മഹല്ല് കമ്മറ്റി ഊര് വിലക്ക് കല്‍പ്പിച്ചത് പ്രാകൃതമാണെന്ന് സിപിഎം സംസ്ഥാന കമ്മറ്റി അംഗം എംവി ജയരാജന്‍.

പാണക്കാട് തങ്ങള്‍ ലീഗിന്റെ സംസ്ഥാന പ്രസിഡന്റ് ആണെന്നും പാര്‍ട്ടിയുടെ നേതാവിനെ വിമര്‍ശിക്കാന്‍ ജനങ്ങള്‍ക്ക് അവകാശമില്ലേ എന്നും ജയരാജന്‍ ചോദിച്ചു. വിമര്‍ശനം ലീഗ് നേതാവിന്റെ അന്തസ് കുറക്കുകയാണെങ്കില്‍ അദ്ദേഹം രാഷ്ട്രീയം ഉപേക്ഷിക്കുകയല്ലേ നല്ലതെന്നും ജയരാജന്‍ വ്യക്തമാക്കി.

നിയമസഭാ തിരഞ്ഞെടുപ്പ് പ്രചരണങ്ങള്‍ക്കിടെ സിപിഎം പ്രവര്‍ത്തകനായ അമ്പലവയല്‍ ആനപ്പാറ സ്വദേശി ലബീബ് ലീഗിനെതിരെ പ്രചരിപ്പിച്ച ചിത്രമാണ് നരിക്കുണ്ട്, ആനപ്പാറ ജുമ മസ്ജിദ് കമ്മറ്റിയുടെ വിലക്കില്‍ കലാശിച്ചത്. ലബീബിനെയും കുടുംബത്തെയും ഊരുവിലക്കികൊണ്ട് മഹല്ല് കമ്മറ്റി പുറത്തുവിട്ട കത്തിന്റെ പകര്‍പ്പുകള്‍ നവ മാധ്യമങ്ങലില്‍ വൈറലാകുകയായിരുന്നു. ഊരു വിലക്കിനെ തുടര്‍ന്ന് കഴിഞ്ഞ ദിവസം നടന്ന ലബീബിന്റെ വിവാഹ ചടങ്ങുകളില്‍ നിന്ന് ആനപ്പാറ മഹല്ല് വിട്ടു നിന്നു. ലബീബിനും കുടുംബത്തിനും നേരെയുണ്ടായ ഊരുവിലക്കിനെതിരെ നവമാധ്യമങ്ങലില്‍ ശക്തമായ പ്രതിഷേധമാണ് ഉണ്ടാകുന്നത്.