കരുണാകരനെ ചതിച്ചത് നരസിംഹ റാവു തന്നെയെന്ന് മുരളീധരൻ

തിരുവനന്തപുരം: ഐഎസ്ആർഒ ചാരക്കേസിൽ കെ.കരുണാകരനെ ചതിച്ചത് അന്ന് പ്രധാനമന്ത്രിയായിരുന്ന നരസിംഹ റാവുവെന്ന് ആവർത്തിച്ച് കെ.മുരളീധരൻ എംഎൽഎ. റാവു അന്ന് സ്വീകരിച്ച നിലപാട് ചതിയാണെന്ന് കരുണാകരൻ പറഞ്ഞിരുന്നു. എന്നാൽ മറ്റ് നേതാക്കളെ കുറിച്ച് കരുണാകരൻ അത്തരത്തിൽ പറഞ്ഞിട്ടില്ലെന്നും മുരളീധരൻ വ്യക്തമാക്കി. നരസിംഹ റാവു സ്വീകരിച്ച നിലപാട് കരുണാകരന് അപചയമുണ്ടാക്കിയെന്നും മുരളീധരൻ വ്യക്തമാക്കി.

നമ്പി നാരായണന് അനുകൂലമായ വിധിയുണ്ടായതിന് പിന്നാലെ നരസിംഹറാവു അന്ന് സ്വീകരിച്ച നിലപാടിനെതിരെ മുരളീധരൻ രംഗത്ത് വന്നിരുന്നു. മരണശേഷമെങ്കിലും കരുണാകരന്റെ ജീവിതത്തിലെ കറുത്തപാട് നീങ്ങിയതിൽ സന്തോഷമുണ്ടെന്നും മുരളീധരൻ പ്രതികരിച്ചു. സുപ്രീം കോടതി ജുഡീഷ്യൽ അന്വേഷണത്തിനായി നിയോഗിച്ച റിട്ട.ജസ്റ്റിസ് ഡി.കെ.ജെയ്ൻ അധ്യക്ഷനായ കമ്മീഷൻ നോട്ടീസ അയച്ചാൽ അന്വേഷണവുമായി സഹകരിക്കുമെന്ന് മുരളീധരൻ പറഞ്ഞു. കരുണാകരനെ ചതിച്ചത് സജീവ കേരള രാഷ്ട്രീയത്തിലെ അഞ്ചു പേരാണ് എന്ന് പത്മജ വേണുഗോപാൽ പറഞ്ഞതിനോട് പ്രതികരിക്കുകയായിരുന്നു മുരളീധരൻ.