നവകേരള സദസ്സ്: ജനങ്ങളുടെ നിർദ്ദേശങ്ങൾ നടപ്പിലാക്കുന്നു; അവലോകന യോഗങ്ങള്‍ തുടങ്ങി

തിരുവനന്തപുരം: നവകേരള സദസ്സുകളിൽ ഓരോ സ്ഥലങ്ങളിലെയും വിവിധ തുറകളിൽ നിന്നുള്ള ജനങ്ങളിൽ നിന്ന് സ്വീകരിച്ച നിർദ്ദേശങ്ങൾ നടപ്പാക്കുന്നതിനുള്ള വകുപ്പുതല അവലോകന യോഗങ്ങൾ തുടങ്ങി. മുഖ്യമന്ത്രിയുടെ നേതൃത്വത്തിലാണ് അവലോകനം നടക്കുന്നത്. ഓരോ വകുപ്പിലെയും ഉന്നതതല ഉദ്യോഗസ്ഥരെ നേരിൽ വിളിച്ച് നിർദ്ദേശങ്ങൾ ഓരോന്നായി പരിശോധിക്കും. അവയുടെ സാധ്യതകൾ തിരിച്ചറിഞ്ഞ് തുടർ നടപടികളിലേക്ക് പോകും. ഇത് ആദ്യത്തെ അവലോകന യോഗമാണ്. തുടർന്നും യോഗങ്ങൾ നടക്കുമെന്നാണ് അറിയുന്നത്. വ്യത്യസ്ത വകുപ്പുകളില്‍ നിന്ന് വന്ന നിര്‍ദേശങ്ങൾ പ്രത്യേകമായി പരിശോധിക്കും. സാങ്കേതിക കാര്യങ്ങള്‍ ഉള്‍പ്പെടെയുള്ളവ പരിശോധനയ്ക്ക് വിധേയമാക്കി ഓരോ നിർദ്ദേശത്തിലും തുടര്‍നടപടികള്‍ കൈക്കൊള്ളാന്‍ യോഗത്തില്‍ മുഖ്യമന്ത്രി നിര്‍ദേശിച്ചു.

മുഖ്യമന്ത്രി പിണറായി വിജയൻ നേരിട്ടാണ് വ്യത്യസ്ത വകുപ്പുകളിലേക്ക് ജനങ്ങൾ നല്‍കിയ നിര്‍ദേശങ്ങള്‍ പരിശോധിക്കാന്‍ ഉന്നതതല ഉദ്യോഗസ്ഥ യോഗം വിളിച്ചിരിക്കുന്നത്. ഇന്ന് തദ്ദേശ സ്വയംഭരണം, എക്സൈസ്, പൊതുമരാമത്ത്, വിനോദസഞ്ചാരം, ആരോഗ്യം, വനിത ശിശുവികസനം, ആയുഷ്, ഉന്നത വിദ്യാഭ്യാസം, സാമൂഹ്യനീതി, കായികം, ന്യുനപക്ഷ ക്ഷേമം, വഖഫ്, സാംസ്ക്കാരികം, മത്സ്യബന്ധനം, യുവജനക്ഷേമം എന്നീ വകുപ്പുകളുടെ അവലോകനം നടന്നു.

ചൊവ്വാഴ്ച വ്യവസായം, നിയമം, മൈനിങ്ങ് ആന്‍റ് ജിയോളജി, പട്ടികജാതി പട്ടിക വര്‍ഗം, ദേവസ്വം, റവന്യു, ഭവന നിര്‍മ്മാണം, പൊതുവിദ്യാഭ്യാസം, തൊഴില്‍, കൃഷി എന്നീ വകുപ്പുകളുടെ അവലോകനമാണ് നടക്കുക. ബുധനാഴ്ച വനം വന്യജീവി, ഗതാഗതം, ജലവിഭവം, വൈദ്യുതി, മൃഗസംരക്ഷണം എന്നീ വകുപ്പുകളുമായി ബന്ധപ്പെട്ട് ഉയര്‍ന്നുവന്ന നിര്‍ദേശങ്ങള്‍ പരിശോധിക്കും.

വെള്ളിയാഴ്ച സഹകരണം, തുറമുഖം, പൊലിസ്, അഗ്നിരക്ഷ, ജയില്‍, സൈനീക ക്ഷേമം, നോര്‍ക്ക, പിആര്‍ഡി, ധനകാര്യം എന്നീ വകുപ്പുകളുടെ പരിശോധനയാണ് നടക്കുക.

20 യോഗങ്ങളാണ് നാല് ദിവസങ്ങളിലായി വിളിച്ചു ചേര്‍ത്തിട്ടുള്ളത്. ചീഫ് സെക്രട്ടറി ഡോ. വി വേണു, വകുപ്പു സെക്രട്ടറിമാര്‍, വകുപ്പുമായി ബന്ധപ്പെട്ട ഉന്നത ഉദ്യോഗസ്ഥര്‍ എന്നിവരാണ് യോഗങ്ങളില്‍ പങ്കെടുക്കുന്നത്.