എൻസിപി- കേരള കോൺഗ്രസ് ബി ലയനത്തിന് അനുമതി

മുംബൈ: കേരള എൻസിപി ഘടകവും കേരള കോൺഗ്രസ് ബിയും ലയനത്തിന് ഒരുങ്ങുന്നു. എൻസിപി കേന്ദ്ര നേതൃത്വം ഇതിന് തത്വത്തിൽ അനുമതി നൽകി. എൻസിപി ദേശീയാധ്യക്ഷൻ ശരത് പവാറുമായി തോമസ് ചാണ്ടി എംഎൽഎ, എ.കെ.ശശീന്ദ്രൻ, ടി.പി.പീതാമ്പരൻ എന്നീ എൻസിപി നേതാക്കൾ നടത്തിയ ചർച്ചയിലാണ് തീരുമാനം.

എൻസിപി കേരള അധ്യക്ഷൻ തോമസ് ചാണ്ടിയാണ് അനുമതി ലഭിച്ചതായി മാധ്യമങ്ങളോട് വെളിപ്പെടുത്തിയത്. ലയന പ്രഖ്യാപനം ഉടൻ ഉണ്ടാകില്ലെന്നും തോമസ് ചാണ്ടി എംഎൽഎ വ്യക്തമാക്കി. എൻസിപി കേന്ദ്രനേതൃത്വം ലയനവുമായി ബന്ധപ്പെട്ട ചർച്ചകൾ നടത്താൻ ഉന്നതാധികാര സമിതിയെ ചുമതലപ്പെടുത്തിയിട്ടുണ്ട്. സമിതിയുടെ റിപ്പോർട്ട് സമർപ്പണത്തിന്റെ അടിസ്ഥാനത്തിൽ മാത്രമേ ലയനം ഔദ്യോഗികമായി പ്രഖ്യാപിക്കൂ എന്ന് തോമസ് ചാണ്ടി വ്യക്തമാക്കി.