ശശീന്ദ്രനെ വീണ്ടും മന്ത്രിയാക്കുന്ന കാര്യത്തിൽ തീരുമാനം ഉടൻ വേണം: എൻസിപി

തിരുവനന്തപുരം: എകെ ശശീന്ദ്രനെ വീണ്ടും മന്ത്രിയാക്കുന്ന കാര്യത്തിൽ തീരുമാനം ഉടൻ വേണമെന്ന ആവശ്യമുന്നയിച്ച് എൻസിപി രംഗത്ത്. മുഖ്യമന്ത്രിയോടും എൽഡിഎഫിനോടും ഇക്കാര്യം ആവശ്യപ്പെടുമെന്നും പാര്‍ട്ടി നേതൃത്വം വ്യക്തമാക്കി. ഇക്കാര്യം പാര്‍ട്ടി കേന്ദ്ര നേതൃത്വവുമായി ചർച്ച ചെയ്തെന്നും ഇക്കാര്യത്തിൽ ഭിപ്രായ ഭിന്നതകളില്ലെന്നും തുടര്‍ന്നാണ് തീരുമാനം കൈക്കൊണ്ടിരിക്കുന്നതെന്നും പാര്‍ട്ടി അറിയിച്ചു. മുന്നണി ഇക്കാര്യത്തിൽ രണ്ടുദിവസത്തിനകം തന്നെ ഉചിതമായ തീരുമാനം എടുക്കുമെന്നാണ് പ്രതീക്ഷിക്കുന്നതെന്നും എൻസിപി സംസ്ഥാന അധ്യക്ഷൻ ടി.പി. പീതാംബരൻ പറഞ്ഞു.

മുൻ മന്ത്രി എ.കെ.ശശീന്ദ്രനെ ടിവി ചാനൽ ഹണിട്രാപ്പിൽ പെടുത്തി കുടുക്കിയതാണെന്ന റിപ്പോര്‍ട്ട് സമര്‍പ്പിച്ചതിന് പിന്നാലെയാണ് പാര്‍ട്ടി നേതൃത്വം ഇക്കാര്യം ആവശ്യപ്പെട്ട് രംഗത്തെത്തിയിരിക്കുന്നത്. സംഭവത്തെ കുറിച്ച് വിശദമായി അന്വേഷിച്ച ജുഡീഷ്യൽ കമ്മീഷൻ കഴിഞ്ഞദിവസമാണ് റിപ്പോർട്ട് സമര്‍പ്പിച്ചത്.