തിരുവനന്തപുരം: കായൽ കൈയേറ്റ വിവാദത്തിൽ തോമസ് ചാണ്ടിയുടെ രാജി സി പി എം ആവശ്യപ്പെട്ടിട്ടില്ലെന്ന് എൻ സി പി നേതൃത്വം. തോമസ് ചാണ്ടി രാജി വെയ്ക്കേണ്ട സാഹചര്യം ഇപ്പോൾ ഇല്ലെന്നും എൻ സി പി ജനറൽ സെക്രട്ടറി എൻ പീതാംബരൻ മാസ്റ്റർ മാധ്യമങ്ങളോട് പറഞ്ഞു.
രാജിസന്നദ്ധത അറിയിക്കേണ്ട സാഹചര്യമില്ലെന്നും അദ്ദേഹം വ്യക്തമാക്കി.
അതേസമയം, ഇന്ന് ചേർന്ന സി പി എം സംസ്ഥാനസമിതിയിൽ തോമസ് ചാണ്ടി വിഷയത്തിൽ തീരുമാനം വൈകരുതെന്ന നിലപാടാണ് ഉണ്ടായത്. ഇനിയും തീരുമാനം എടുക്കാതിരിക്കുന്നത് മുന്നണിക്കും സർക്കാരിനും നാണക്കേട് ഉണ്ടാക്കുമെന്നും സംസ്ഥാനസമിതിയിൽ വിലയിരുത്തൽ ഉണ്ടായി.
ഇതിനിടെ, എൻ സി പി ദേശീയ നേതൃത്വത്തെ തോമസ് ചാണ്ടി രാജി സന്നദ്ധത അറിയിച്ചു. എന്നാൽ, ബുധനാഴ്ച കോടതിവിധി വരുന്നതു വരെ കാത്തിരിക്കാനാണ് എൻ സി പി ദേശീയനേതൃത്വം തോമസ് ചാണ്ടിക്ക് നിർദ്ദേശം നൽകിയിരിക്കുന്നത്. എന്നാൽ, കോടതി വിധി എന്തായാലും താൻ രാജി വെക്കുമെന്നാണ് തോമസ് ചാണ്ടിയുടെ നിലപാട്. അപമാനം പേറി മന്ത്രിസ്ഥാനത്ത് തുടരില്ലെന്നും തോമസ് ചാണ്ടി വ്യക്തമാക്കി.
ഇതിനിടയിലാണ് തോമസ് ചാണ്ടി രാജി വെയ്ക്കേണ്ട കാര്യമില്ലെന്ന് വ്യക്തമാക്കി പാർട്ടി സംസ്ഥാന നേതൃത്വം തന്നെ രംഗത്ത് എത്തിയിരിക്കുന്നത്.
(ചിത്രത്തിന് കടപ്പാട് - സുപ്രഭാതം)
NCP says Thomas Chandy no need to resign
NCP says CPM did not ask for minister Thomas Chandy's resignation