തോമസ് ചാണ്ടിയെ എൻസിപിയും കൈവിടുന്നു

കൊച്ചി: മന്ത്രി തോമസ് ചാണ്ടി രാജിവയ്ക്കണമെന്ന് എൻസിപി യോഗത്തിൽ പൊതുവികാരം. മുന്നണിമര്യാദ പാലിക്കണമെന്നും രാജി വയ്ക്കുന്നതാണ് ഉചിതമെന്നും യോഗത്തിൽ ആവശ്യമുയര്‍ന്നു.

സ‍ര്‍ക്കാരിനെതിരെ മന്ത്രി തോമസ ചാണ്ടി കോടതിയെ സമീപിച്ച നടപടി ശരിയായില്ലെന്ന് സര്‍ക്കാര്‍ ഇന്ന് കോടതിയിൽ അറിയിച്ചിരുന്നു. മന്ത്രി തോമസ് ചാണ്ടിയെ രൂക്ഷമായി വിമര്‍ശിച്ച ഹൈക്കോടതി ഡിവിഷൻ ബെഞ്ച് മന്ത്രിയ്ക്ക് മുഖ്യമന്ത്രിയെ വിശ്വാസമില്ലേയെന്നും ആരാഞ്ഞു. സര്‍ക്കാരിനെതിരെ തോമസ് ചാണ്ടി നല്‍കിയ ഹര്‍ജി പിൻവലിച്ചില്ലെങ്കിൽ വിധിന്യായത്തിൽ ഹര്‍ജി അനുചിതമായെന്ന് വിധിന്യായത്തിൽ എഴുതേണ്ടിവരുമെന്നും കോടതി പറഞ്ഞു. ഇന്ന് ഉച്ചയ്ക്ക് 1.35ന് കോടതി വീണ്ടും ചേരും. ഈ സാഹചര്യത്തിൽ തോമസ് ചാണ്ടിയ്ക്ക് ഹ‍ര്‍ജി പിൻവലിക്കാതെ തരമില്ലെന്നാണ് വിലയിരുത്തൽ.

മാര്‍ത്താണ്ഡം കായൽ കയ്യേറ്റവിഷയത്തിൽ ആലപ്പുഴ ജില്ലാ കളക്ടറുടെ റിപ്പോര്‍ട്ട് റദ്ദാക്കണമെന്ന് ആവശ്യപ്പെട്ടായിരുന്നു മന്ത്രി തോമസ് ചാണ്ടി കോടതിയെ സമീപിച്ചത്. എന്നാൽ കളക്ടറും സര്‍ക്കാരിന്‍റെ ഭാഗമാണെന്നും മന്ത്രി സര്‍ക്കാരിനെ ആക്രമിക്കുകയാണെന്നുമായിരുന്നു കോടതിയുടെ പ്രതികരണം. ഇതോടെ തോമസ് ചാണ്ടിയുടെ ഹ‍ര്‍ജി സര്‍ക്കാരിനെതിരല്ലെന്നു ആദ്യം നിലപാടെടുത്ത സര്‍ക്കാരും മലക്കം മറിഞ്ഞു.