മൂന്നാറിൽ വീണ്ടും നീലവസന്തം വിടരുന്നു

മൂന്നാര്‍: പശ്ചിമഘട്ട മലനിരകളുടെ ഹൃദയരേഖകളായ തേയിലത്തോട്ടങ്ങളില്‍ ഇനി ഹരിതാഭയുടെ മനോഹാരിതയ്ക്കൊപ്പം നീലവസന്തം വിരിയുന്നു. മൂന്നാറിലെ കുറിഞ്ഞി പൂക്കാലത്തിന്‍റെ വിളംബരമറിയിച്ചുകൊണ്ട് ബുധനാഴ്ച രാവിലെ 8.30ന് എറണാകുളം ദർബാർ ഹാൾ ഗ്രൗണ്ടിൽ നിന്നും വിളംബര വാഹനറാലി ആരംഭിക്കും. വിസിറ്റ് മൂന്നാർ, വിസിറ്റ് കുറിഞ്ഞി, സേവ് കുറിഞ്ഞി എന്ന സന്ദേശമാണ്‌ റാലിയിലൂടെ വിളംബരം ചെയ്യുന്നത്..


കേരള ടൂറിസം ജോയിന്റ് ഡയറക്ടർ ശ്രീ:കെ.പി നന്ദകുമാർ, ഇടുക്കി ടൂറിസം ഡെപ്യൂട്ടി ഡയറക്ടർ ശ്രീ: കെ.എസ് ഷൈൻ എന്നിവരുടെ സാന്നിധ്യത്തിൽ കേരള ട്രാവൽ മാർട്ട് സൊസൈറ്റി പ്രസിഡൻറ് ശ്രീ: ബേബി മാത്യു സോമതീരവും, നാഷണൽ ടൂറിസം അഡ്വൈസറി കൗൺസിൽ മെമ്പർ ശ്രീ: എബ്രഹാം ജോർജ്ജും ചേർന്ന് ഫ്ളാഗ് ഓഫ് ചെയ്ത് എറണാകുളത്തു നിന്നും ആരംഭിക്കുന്ന വിളംബര വാഹനറാലി,മൂന്നാർ ടൂറിസത്തിന്റെ പുത്തൻ പ്രതീക്ഷകളിലേക്ക് വെളിച്ചം വീശിക്കൊണ്ട് ,കടന്നുപോകുന്ന വീഥികളിലൊക്കെയും ആവേശത്തിന്റെ മാറ്റൊലി തീർകുമെന്നു പ്രതീക്ഷിക്കുകയാണ്.



ഒരു മനുഷ്യായുസ്സിൽ നാം ഒരുവട്ടമെങ്കിലും കണ്ടിരിക്കേണ്ട പ്രകൃതിയുടെ അഭൂതപൂർവമായ വേഷപ്പകർച്ചക്ക് നീല വസന്തത്തിന്റെ മാസ്മരിക ഭാവങ്ങൾ തീർക്കുന്ന, മൂന്നാറിന്‍റെ കുറിഞ്ഞിപ്പൂക്കാലം കാണുവാനും ആസ്വദിക്കുവാനും വരുംതലമുറയ്ക്കായി കരുത്തിവെയ്ക്കുവാനുമായി ലോകജനതയെ മൂന്നാറിലേക്ക് സ്വാഗതം ചെയ്യുന്നതിനായാണ് വിളംമ്പര റാലി സംഘടിപ്പിച്ചിരിക്കുന്നത്.