പുനരധിവാസത്തിനുശേഷം നെഹ്റു ട്രോഫി നടത്തും

ആലപ്പുഴ: സംസ്ഥാനത്തെ പ്രളയക്കെടുതിയുടെ പേരില്‍ നെഹ്റു ട്രോഫി വള്ളംകളി ഒഴിവാക്കില്ലെന്ന് മന്ത്രി തോമസ് ഐസക്ക്. പ്രളയബാധിതരുടെ പുനരധിവാസം പൂര്‍ത്തിയായശേഷം വള്ളംകളി സംഘടിപ്പിക്കുമെന്ന് മന്ത്രി അറിയിച്ചു. പ്രളയത്തെ തുടര്‍ന്ന് നെഹ്റു ട്രോഫി വള്ളംകളിയും ഇതിനോട് അനുബന്ധിച്ച്‌ നടത്താനിരുന്ന സാംസ്കാരിക ഘോഷയാത്രയും മറ്റു പരിപാടികളും മുമ്പ് റദ്ദാക്കിയിരുന്നു. ഈ മാസം 8, 9, 10 തീയതികളിലായിരുന്നു സാംസ്കാരിക ഘോഷയാത്രയും പരിപാടികളും നടത്താന്‍ തീരുമാനിച്ചിരുന്നത്. ആലപ്പുഴ പുന്നമടക്കായലില്‍ ഓഗസ്റ്റിലെ രണ്ടാമത്തെ ശനിയാഴ്ചയാണ് ജലോത്സവം നടത്താറുള്ളത്.

ആലപ്പുഴ ജില്ലയിലെ ദുരിതാശ്വാസ ക്യാമ്പുകളുടെ പ്രവർത്തനം ഓഗസ്റ്റ് 30 ഓടെ അവസാനിപ്പിക്കുമെന്ന് മന്ത്രി വ്യക്തമാക്കി. വീടുകളിലേക്ക് മാറുന്നവർക്ക് രണ്ട് ദിവസത്തിനകം വില്ലേജ് ഓഫീസുകൾ വഴി കിറ്റുകൾ നൽകും. വീടുകളിൽ വെള്ളം കെട്ടി നിൽക്കുന്ന പ്രദേശങ്ങളിലെ ജനങ്ങൾക്കായി ഓഡിറ്റോറിയങ്ങൾ കേന്ദ്രീകരിച്ച് പുതിയ ക്യാമ്പുകൾ തുടങ്ങുന്ന കാര്യം ആലോചിക്കുകയാണെന്നും അദ്ദേഹം വ്യക്തമാക്കി.