ബിജെപിയുടെ അക്കൗണ്ട് പൂട്ടി; നേമത്ത് ശിവൻകുട്ടിക്ക് ജയം

കൊച്ചി: നേമത്ത് എൽഡിഎഫ് സ്ഥാനാർത്ഥി വി ശിവൻകുട്ടി ജയത്തിലേക്ക്. 5750 വോട്ടുകൾക്കാണ് ശിവൻകുട്ടി ലീഡ് ചെയ്യുന്നത്. ബിജെപി സ്ഥാനാർത്ഥിയായ കുമ്മനം രാജശേഖരനാണ് രണ്ടാമതെത്തിയിരിക്കുന്നത്.

അഞ്ച് കൊല്ലം മുമ്പ് ബിജെപി നേമത്ത് തുറന്ന് അക്കൗണ്ട് പൂട്ടിക്കുമെന്ന് മുഖ്യമന്ത്രി പിണറായി വിജയൻ നേരത്തെ വ്യക്തമാക്കിയിരുന്നു.

2016 ൽ 8671 വോട്ടുകളുടെ ഭൂരിപക്ഷത്തിന് ബിജെപിയുടെ ഒ രാജഗോപാൽ വിജയിച്ച മണ്ഡലമാണ് നേമം. ഇക്കുറി മണ്ഡലം നിലനിർത്താൻ കഴിയുമെന്ന പ്രതീക്ഷയിലായിരുന്നു ബിജെപി. ശക്തമായ മത്സരം കാഴ്ചവെച്ച് മണ്ഡലം തിരികെ പിടിച്ചിരിക്കുകയാണ് വി ശിവൻകുട്ടി.

കെ മുരളീധരനാണ് യുഡിഎഫിനുവേണ്ടി മത്സരത്തിനിറങ്ങിയത്. കുമ്മനം രാജശേഖരനായിരുന്നു മണ്ഡലം നിലനിർത്താനുള്ള ദൗത്യം. സിപിഎമ്മും കോണ്‍ഗ്രസും മാറി മാറി വിജയിച്ച മണ്ഡലത്തിൽ ബിജെപിയും 2016ലാണ് ശക്തമായ സാന്നിധ്യം അറിയിച്ചത്.

2016ൽ ബിജെപി സ്ഥാനാര്‍ത്ഥി ഒ രാജഗോപാൽ 67,813 വോട്ടുകളോടെയാണ് ജയിച്ചത്. മുൻ എംഎൽഎ കൂടിയായ എൽഡിഎഫിന്റെ വി. ശിവൻകുട്ടിയെ ആണ് രാജഗോപാൽ തോൽപ്പിച്ചത്. ശിവൻകുട്ടിക്ക് 59,142 വോട്ടുകളാണ് ലഭിച്ചത്. യുഡിഎഫിന്റെ വി. സുരേന്ദ്രൻ പിള്ളയാണ് മറ്റൊരു എതിരാളി 13,860 വോട്ടുകളാണ് ലഭിച്ചത്.