സംസ്ഥാനത്ത് ഇന്ന് സ്ഥിരീകരിച്ചത് ഏഴ് മരണം: ആകെ മരണം 146

തിരുവനന്തപുരം: കേരളത്തില്‍ കൊവിഡ് രോഗബാധ ഏറ്റവും ഉയര്‍ന്ന കണക്കുകളിൽ എത്തിയതോടെ മരണവും ദിനം പ്രതി വര്‍ദ്ധിച്ചു വരികയാണ്. ഇന്ന് മാത്രം സംസ്ഥാനത്ത് ഏഴ് മരണമാണ് റിപ്പോര്‍ട്ട് ചെയ്തിരിക്കുന്നത്. ഇക്കൂട്ടത്തിൽ കഴിഞ്ഞ ദിവസങ്ങളില്‍ മരിച്ചവരുടെ പരിശോധനാ ഫലവും ഉള്‍പ്പെടുന്നു. ഇതോടെ കൊവിഡ് ബാധിച്ച് മരിച്ചവരുടെ എണ്ണം 146 ആയി ഉയര്‍ന്നു.

Also Read : സംസ്ഥാനത്ത് 1,409 പേര്‍ക്ക് സമ്പര്‍ക്കത്തിലൂടെ രോഗബാധ; പുതിയതായി 20 ഹോട്സ്പോട്ടുകൾ കൂടി

ആഗസ്റ്റ് നാലിന് മരണമടഞ്ഞ തിരുവനന്തപുരം അഞ്ചുതെങ്ങ് സ്വദേശിനി ജൂഡി 69 വയസ്സ്, ആഗസ്റ്റ് 13 ന് മരണമടഞ്ഞ കൊല്ലം കുണ്ടറ സ്വദേശിനി ഫിലോമിന 70 വയസ്സ്, ആഗസ്റ്റ് മൂന്നിന് മരണമടഞ്ഞ എറണാകുളം ആലുവ സ്വദേശിനി സതി വാസുദേവന്‍ 64 വയസ്സ്, ആഗസ്റ്റ് എട്ടിന് മരണമടഞ്ഞ കാസര്‍ഗോഡ് സ്വദേശിനി അസീസ് ഡിസൂസ 81 വയസ്സ്, ആഗസ്റ്റ് 11ന് മരണമടഞ്ഞ എറണാകുളം വട്ടപ്പറമ്പ് സ്വദേശി എം.ഡി. ദേവസി 75 വയസ്സ്, ആഗസ്റ്റ് 13ന് മരണമടഞ്ഞ തിരുവനന്തപുരം പൂന്തുറ സ്വദേശിനി ലക്ഷ്മിക്കുട്ടി 69 വയസ്സ്, ആഗസ്റ്റ് ഏഴിന് മരണമടഞ്ഞ അയിര ചെങ്കവിള സ്വദേശി രവി 58 വയസ്സ് എന്നിവരുടെ പരിശോധനാഫലം കോവിഡ്-19 മൂലമാണെന്ന് എന്‍ഐവി ആലപ്പുഴ സ്ഥിരീകരിച്ചു.

Also Read : സ്വാതന്ത്ര്യദിന പ്രസംഗത്തിൽ മോദി ലക്ഷ്യമിട്ടത് ചൈനയെ; പ്രസംഗം ചര്‍ച്ചയാകുന്നു

ഇത് കൂടാതെ ഉണ്ടായ മരണങ്ങള്‍ എന്‍ഐവി ആലപ്പുഴയിലെ പരിശോധനയ്ക്ക് ശേഷം സ്ഥിരീകരിക്കുന്നതാണെന്നും ഔദ്യോഗിക വൃത്തങ്ങൾ അറിയിച്ചിട്ടുണ്ട്. സംസ്ഥാനത്ത് ഇന്ന് പുതിയതായി 1603 പേര്‍ക്ക് കൊവിഡ് രോഗബാധ റിപ്പോര്‍ട്ട് ചെയ്തപ്പോൾ 1,409 പേര്‍ക്ക് സമ്പര്‍ക്കത്തിലൂടെയാണ് രോഗം ബാധിച്ചത്. അതില്‍ 112 പേരുടെ സമ്പര്‍ക്ക ഉറവിടം വ്യക്തമല്ല. ഇന്ന് തിരുവനന്തപുരത്തേക്കാള്‍ കൊവിഡ് രോഗബാധ റിപ്പോര്‍ട്ട് ചെയ്തിരിക്കുന്നത് മലപ്പുറം ജില്ലയിലാണ്. 362 പേര്‍ക്കാണ് രോഗം റിപ്പോര്‍ട്ട് ചെയ്തിരിക്കുന്നത്.