ലോക്ക് ഡൗൺ മെയ് 30 വരെ
സംസ്ഥാനത്ത് കൊവിഡ് 19 ലോക്ക് ഡൗൺ മെയ് 30 വരെ നീട്ടാൻ തീരുമാനിച്ചതായി മുഖ്യമന്ത്രി തീരുമാനിച്ചു. എന്നാൽ മലപ്പുറത്ത് മാത്രമാണ് നാളെ മുതൽ ട്രിപ്പിള്‍ ലോക്ക് ഡൗൺ ഉണ്ടാകുക. നാളെ രാവിലെ മുതൽ എറണാകുളം, തൃശൂര്‍, തിരുവനന്തപുരം ജില്ലകളിൽ ട്രിപ്പിള്‍ ലോക്ക് ഡൗൺ ഉണ്ടാകില്ല. ഈ ജില്ലകളിൽ ടിപിആര്‍ കുറഞ്ഞ സാഹചര്യത്തിലാണ് തീരുമാനം. മലപ്പുറത്ത് ടിപിആര്‍ കുറയാത്ത സാഹചര്യം പ്രത്യേകം പരിഗണിക്കുമെന്ന് മുഖ്യമന്ത്രി വ്യക്തമാക്കി.
ടെസ്റ്റ് പോസിറ്റിവിറ്റി നിരക്ക് കുറഞ്ഞു
അതേസമയം, സംസ്ഥാനത്ത് മൊത്തത്തിൽ ടെസ്റ്റ് പോസിറ്റിവിറ്റി നിരക്ക് കുറഞ്ഞതായി മുഖ്യമന്ത്രി വ്യക്തമാക്കി. 22.22 ആണ് ഇന്നത്തെ ടെസ്റ്റ് പോസിറ്റിവിറ്റി നിരക്ക്. റുട്ടീന്‍ സാമ്പിള്‍, സെന്റിനല്‍ സാമ്പിള്‍, സിബി നാറ്റ്, ട്രൂനാറ്റ്, പി.ഒ.സി.ടി. പി.സി.ആര്‍., ആര്‍.ടി. എല്‍.എ.എം.പി., ആന്റിജന്‍ പരിശോധന എന്നിവ ഉള്‍പ്പെടെ ആകെ 1,85,55,023 സാമ്പിളുകള്‍ ഇന്ന് പരിശോധിച്ചതായും സംസ്ഥാന സര്‍ക്കാര്‍ വാര്‍ത്താക്കുറിപ്പിൽ വ്യക്തമാക്കി.
ബ്ലാക്ക് ഫംഗസ് മരണങ്ങള്‍ തുടരുന്നു
സംസ്ഥാനത്ത് കൊവിഡ് 19 പ്രതിസന്ധിയ്ക്ക് പിന്നാലെ ബ്ലാക്ക് ഫംഗസ് ബാധിച്ച് രണ്ട് പേര്‍ മരിച്ചതോടെ ഇതു സംബന്ധിച്ച ആശങ്ക ശക്തമാണ്. എന്നാൽ കൊവിഡിനു മുൻപു തന്നെ സംസ്ഥാനത്ത് ബ്ലാക്ക് ഫംഗസ് ബാധിച്ചു മരണങ്ങള്‍ സംഭവിച്ചിട്ടുണ്ടെന്നും ആശങ്കപ്പെടേണ്ട സാഹചര്യമില്ലെന്നും മുഖ്യമന്ത്രി വ്യക്തമാക്കിയിരുന്നു. കഴിഞ്ഞ വര്‍ഷം ഇതേ കാലയളവിൽ കൂടുതൽ പേര്‍ ബ്ലാക്ക് ഫംഗസ് ബാധിച്ചു മരിച്ചിട്ടുണ്ടെന്നാണ് സര്‍ക്കാര്‍ കണക്കുകള്‍. പ്രമേഹരോഗികളെയും രോഗപ്രതിരോധശേഷി കുറഞ്ഞവരെയുമാണ് രോഗം ഗുരുതരമായി ബാധിക്കുന്നത്.
ഏറ്റവുമധികം രോഗബാധ തിരുവനന്തപുരത്ത്
ഇന്ന് ഏറ്റവുമധികം പേര്‍ക്ക് രോഗം സ്ഥിരീകരിച്ചത് തിരുവനന്തപുരം ജില്ലയിലാണ്. 3836 കേസുകളാണ് ജില്ലയിൽ റിപ്പോര്‍ട്ട് ചെയ്തത്. മലപ്പുറത്ത് 3363 പേര്‍ക്കും എറണാകുളത്ത് 2984 പേര്‍ക്കും രോഗം സ്ഥിരീകരിച്ചു. പാലക്കാട് 1746, കൊല്ലം 2736, തൃശൂര്‍ 2468, കോഴിക്കോട് 2341, ആലപ്പുഴ 2057, കോട്ടയം 1600, കണ്ണൂര്‍ 1293, ഇടുക്കി 1068, പത്തനംതിട്ട 863, കാസര്‍ഗോഡ് 636, വയനാട് 362 എന്നിങ്ങനെയാണ് മറ്റു ജില്ലകളിലെ രോഗബാധ. 24 മണിക്കൂറിനുള്ളിൽ 129 ആരോഗ്യപ്രവര്‍ത്തകര്‍ക്കും 24 മണിക്കൂറിനുള്ളിൽ രോഗം സ്ഥിരീകരിച്ചു.