സംസ്ഥാനത്ത് ചൂട് കൂടുന്നു; തൊഴിലുറപ്പ് പദ്ധതി സമയം ക്രമീകരിച്ചു

പത്തനംതിട്ട: സംസ്ഥാനത്ത് ചൂട് വർധിക്കുന്നതിനാൽ തൊഴിലുറപ്പ് തൊഴിലാളികളുടെ സമയത്തിലും ക്രമീകരണം. പത്തനംതിട്ട ജില്ലയിൽ മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയില്‍ പണിയെടുക്കുന്ന തൊഴിലാളികള്‍ക്ക് ഏപ്രില്‍ 30 വരെ ഉച്ചയ്ക്ക് 12 മുതല്‍ ഉച്ചയ്ക്ക് ശേഷം മൂന്ന് വരെ വിശ്രമം അനുവദിച്ചതായി ജില്ലാ കളക്ടര്‍ അറിയിച്ചു.

നിശ്ചിത പ്രവൃത്തിയുടെ അളവിലും പ്രവൃത്തി ചെയ്യേണ്ട ആകെ സമയത്തിലും മാറ്റം വരാതെ രാവിലെ ഏഴ് മുതല്‍ വൈകിട്ട് ഏഴ് വരെയുള്ള സമയത്തിനുള്ളില്‍ പ്രവൃത്തി സമയം പുനക്രമീകരിക്കാം. കൂടാതെ പ്രവൃത്തിയിടങ്ങളില്‍ തൊഴിലാളികള്‍ക്ക് വിശ്രമിക്കുന്നതിനുള്ള ഷെഡ്, കുടിവെള്ളം, പ്രഥമ ശുശ്രൂഷാ കിറ്റ് എന്നിവ ഉറപ്പുവരുത്തണമെന്നും കളക്ടര്‍ നിര്‍ദേശിച്ചു. .

നിര്‍മാണ സൈറ്റുകളിലും മറ്റു തൊഴിലിടങ്ങളിലും ആശുപത്രികളിലും കുടിവെള്ളം, അവശ്യ മരുന്നുകള്‍, ഒആര്‍എസ്, ഐസ് പാക്കുകള്‍ തുടങ്ങിയ ലഭ്യമാക്കണമെന്നും വിശ്രമകേന്ദ്രങ്ങള്‍ അനുവദിക്കമെന്നും നേരത്തെ ദുരന്തനിവാരണ അതോറിറ്റി നിര്‍ദ്ദേശിച്ചിരുന്നു.

അന്യസംസ്ഥാന തൊഴിലാളികള്‍ക്ക് ആവശ്യമായ നിര്‍ദേശങ്ങള്‍ അവരുടെ ഭാഷയിൽ തയ്യാറാക്കിയ ലഘുലേഖകളായി നല്‍കണമെന്നും നിര്‍ദേശമുണ്ട്. നിര്‍ദേശങ്ങള്‍ പാലിക്കുന്നുണ്ടോ എന്നറിയാൻ ലേബര്‍ ഓഫീസര്‍മാര്‍ പരിശോധന നടത്തണമെന്നും നിര്‍ദേശമുണ്ട്.