സനൽ കുമാറിന്റെ ഭാര്യയ്ക്ക് സർക്കാർ ജോലി നൽകണമെന്ന് പോലീസ്

തിരുവനന്തപുരം: ഡിവൈഎസ്പി ബി ഹരികുമാർ കാറിനു മുന്നിൽ തള്ളിയിട്ട് കൊലപ്പെടുത്തിയ സനൽ കുമാറിന്റെ ഭാര്യയ്ക്ക് സർക്കാർ ജോലി നൽകണമെന്നുകാണിച്ച് ഡിജിപി ലോക്നാഥ് ബെഹ്റ സർക്കാരിന് കത്തുനൽകി. സനൽ കുമാറിന്റെ ഭാര്യയ്ക്ക് ജോലി നൽകണമെന്ന കുടുംബത്തിന്റെ അപേക്ഷയുടെ ഭാഗമായാണ് ഡിജിപി മുഖ്യമന്ത്രിക്ക് ശുപാർശ സമർപ്പിച്ചത്.

സനലിനെ കൊലപ്പെടുത്തിയിടത്ത് സമരം ഇരിക്കുമെന്ന് സനലിന്റെ കുടുംബം ഇന്നലെ വ്യക്തമാക്കിയിരുന്നു. അറസ്റ്റ് വൈകിയാൽ സെക്രട്ടറിയറ്റിനു മുന്നിൽ നിരാഹാരം ഇരിക്കുമെന്ന് സനലിന്റെ സഹോദരി ഇന്നലെ പറഞ്ഞിരുന്നു. പ്രതിയെ പിടികൂടുന്നതിനൊപ്പം കുടുംബത്തിന് നഷ്ടപരിഹാരവും ഭാര്യയ്ക്ക് ജോലിയും നൽകണമെന്ന് ആക്ഷൻ കൌൺസിൽ ആവശ്യപ്പെട്ടിരുന്നു. അടുത്ത ബുധനാഴ്ചത്തെ മന്ത്രിസഭാ യോഗത്തിൽ തീരുമാനം ഉണ്ടായില്ലെങ്കിൽ വ്യാഴാഴ്ച മുതൽ സെക്രട്ടറിയറ്റിനു മുന്നിൽ സമരം തുടങ്ങനാണ് സനലിന്റെ ഭാര്യയുടെ തീരുമാനം.

സനലിന്റെ കൊലപാതകം നടന്നിട്ട് ആറ് ദിവസം കഴിഞ്ഞെങ്കിലും ബി ഹരികുമാറിനെ പിടികൂടാൻ ഇനിയും കഴിഞ്ഞിട്ടില്ല. ഹരികുമാർ പോലീസിൽ കീഴടങ്ങുമെന്നാണ് പ്രതീക്ഷിച്ചതെങ്കിലും ഇനിയതിന് സാധ്യതയില്ലെന്നാണ് പോലീസ് വ്യക്തമാക്കിയിരിക്കുന്നത്. ഹരികുമാറും ബി ഹരികുമാറും ഒരുമിച്ചാണ് ഒളിവിൽ പോയതെന്നാണ് പോലീസ് കരുതുന്നത്.