സംസ്ഥാനത്ത് നിപ നിയന്ത്രണ വിധേയമെന്ന് ആരോഗ്യമന്ത്രി

കോഴിക്കോട്: സംസ്ഥാനത്ത് നിപ വൈറസ് ബാധ നിയന്ത്രണ വിധേയമായെന്ന് ആരോഗ്യമന്ത്രി കെ.കെ.ശൈലജ. പുതിയ കേസുകളൊന്നും റിപ്പോർട്ട് ചെയ്യാത്ത സാഹചര്യത്തിൽ നിപ പൂർണമായും നിയന്ത്രണ വിധേയമായെന്നാണ് വിലയിരുത്തലെന്നും മന്ത്രി പറഞ്ഞു. രോഗബാധയുമായി ബന്ധപ്പെട്ട അവലോകന യോഗത്തിന് ശേഷം സംസാരിക്കുകയായിരുന്നു മന്ത്രി.

ജൂണ്‍ 12 വരെ 2,649 പേരാണ് നിരീക്ഷണ പട്ടികയില്‍ ഉണ്ടായിരുന്നത്. ഇപ്പോള്‍ 1,430 പേര്‍ മാത്രമാണ് നിരീക്ഷണത്തിലുള്ളത്. മെയ് 31ന് ശേഷം നിരീക്ഷണ പട്ടികയിലുള്ള ആര്‍ക്കും രോഗം റിപ്പോർട്ട് ചെയ്തിട്ടില്ല.

കോഴിക്കോട്, മലപ്പുറം ജില്ലകളിൽ ജൂൺ 12ന് തന്നെ സ്കൂളുകൾ തുറക്കും. പൊതുപരിപാടികൾക്ക് അനുമതി നൽകുകയും ചെയ്യുമെന്ന് മന്ത്രി വ്യക്തമാക്കി. നിലവിൽ നിരീക്ഷണത്തിലുള്ളവരെ ഒറ്റപ്പെടുത്തരുതെന്നും മന്ത്രി അഭ്യർഥിച്ചു.