നിപ വൈറസിന് കാരണം വവ്വാലുകളോയെന്ന് ഇന്നറിയാം

കോഴിക്കോട്: നിപ വൈറസിന്‍റെ വാഹകർ വവ്വാലുകളാണോയെന്ന് ഇന്നറിയാം. ആദ്യമായി നിപ വൈറസ് ബാധ റിപ്പോർട്ട് ചെയ്ത കോഴിക്കോട് പന്തിരിക്കരയിൽ നിന്നും ശേഖരിച്ച വവ്വാലുകളുടെയും മൃഗങ്ങളുടെയും രക്തസാമ്പിളുകളുടെ ഫലമാണ് ഇന്നെത്തുന്നത്.

ഇന്ന് വൈകുന്നേരത്തോടെ ഫലം എത്തുമെന്നാണ് മൃഗസംരക്ഷണ വകുപ്പ് അറിയിച്ചിരിക്കുന്നത്. ഫലം ലഭിക്കുന്നതോടെ നിപ വൈറസ് പരത്തുന്നത് വവ്വാലുകൾ തന്നെയാണോ എന്നതിൽ വ്യക്തതയുണ്ടാകും. സ്ഥിതിഗതികള്‍ വിലയിരുത്താനായി ഉച്ചക്ക് ശേഷം ആരോഗ്യ മന്ത്രി കെ. കെ ശൈലജയുടെ നേതൃത്വത്തിൽ കളക്ട്രേറ്റില്‍ സര്‍വകക്ഷി യോഗവും ചേരും.

നിപ്പ വൈറസ് ബാധയെ തുടർന്ന് നാല് പേര്‍ മരിച്ച കുടുംബത്തിന്‍റെ പുരയിടത്തിലെ കിണറ്റില്‍ നിന്നും പിടികൂടിയ വവ്വാലുകളുടെ രക്തവും സ്രവവുമായിരുന്നു ഭോപ്പാലിലെ പ്രത്യേക ലാബിലേക്ക് അയച്ചത്. ഇതിനു പുറമേ സമീപ പ്രദേശങ്ങളിലുള്ള പശുക്കളുടേയും പന്നികളുടേയും രക്തസാമ്പിളുകളും പരിശോധനക്കായി അയച്ചിരുന്നു.