'ലൗ ജിഹാദ്'; കേന്ദ്രത്തിന്റെ നിലപാട് എന്ത്?
ലൗ ജിഹാദിന് നിയമത്തില് വ്യാഖ്യാനങ്ങളില്ലെന്ന് കേന്ദ്ര സര്ക്കാര്. സംസ്ഥാനത്ത് ഇതുവരെ ലൗ ജിഹാദ് റിപ്പോര്ട്ട് ചെയ്തിട്ടില്ലെന്ന് കേന്ദ്ര സര്ക്കാര് പറഞ്ഞു. ഇതുമായി ബന്ധപ്പെട്ട രണ്ട് കേസുകള് എന്ഐഎ അന്വേഷിക്കുന്നുണ്ടെന്ന് ആഭ്യന്തര മന്ത്രാലയം അറിയിച്ചു. ലോക്സഭയില് ബെന്നി ബെഹ്നാന് എം പി ഉന്നയിച്ച ചോദ്യത്തിനു മറുപടിയായാണ് കേന്ദ്ര ആഭ്യന്തര മന്ത്രാലയം സഹമന്ത്രി നിത്യാനന്ദ് റായ് ഇപ്രകാരം പറഞ്ഞത്.
കേരള സര്ക്കാരിന്റെ നിലപാട്?
കേരളത്തില് ലൗ ജിഹാദില്ലെന്ന് കേരള സര്ക്കാരും ഹൈക്കോടതിയും നേരത്തെ തന്നെ വ്യക്തമാക്കിയിരുന്നു. 'കേന്ദ്ര ആഭ്യന്തര മന്ത്രാലയത്തിന്റെ രേഖകളിലും അന്വേഷണത്തിലും കേരളത്തില് ലൗ ജിഹാദ് നടന്നതായി കണ്ടെത്തിയിട്ടില്ല. കേരളത്തില് രണ്ട് മതത്തില്പ്പെട്ടവര് തമ്മില് വിവാഹം നടന്നിട്ടുണ്ട്. എന്നാല്, എന്ഐഎ അന്വേഷിച്ചിട്ടും ലൗ ജിഹാദ് നടന്നതായി കണ്ടെത്തിയിട്ടില്ല', മന്ത്രി പറഞ്ഞു.
ഒടുവില് സര്ക്കാരിനെ പഴിചാരി കെസിബിസി
ഐഎസ് പോലുള്ള ഭീകരസംഘടനയിലേക്ക് പോലും ക്രിസ്ത്യന് പെണ്കുട്ടികള് റിക്രൂട്ട് ചെയ്യപ്പെടുന്നതിന് സര്ക്കാരിന്റെ നിലപാടും കാരണമാണെന്ന് കഴിഞ്ഞ ദിവസം കെസിബിസി ഡെപ്യൂട്ടി സെക്രട്ടറി ഫാ വര്ഗീസ് വള്ളിക്കാട്ട് പറഞ്ഞിരുന്നു. 'ലവ് ജിഹാദ് പോലെയുള്ള സംഭവങ്ങള് നിയമപരമായി നേരിടാന് കഴിയില്ലെന്ന് മനസ്സിലായിട്ടുള്ള കാര്യമാണ്. രാഷ്ട്രീയ രംഗത്തുള്ളവരുടെ നിലപാടുകൊണ്ടാണ് അതിനുള്ള വ്യവസ്ഥകള് സൃഷ്ടിക്കാന് സാധിക്കാത്തത്', ഫാ വര്ഗീസ് വള്ളിക്കാട്ട് പറഞ്ഞു.
ലൗ ജിഹാദ് ഉണ്ടെന്ന് ആവര്ത്തിച്ച് പള്ളികളില് ഇടയലേഖനം വായിച്ച് സഭ
കേരളത്തില് ലൗ ജിഹാദ് ഉണ്ടെന്ന് ആവര്ത്തിച്ച് സീറോ മലബാര് സഭ ഞായറാഴ്ച പള്ളികളില് ഇടയലേഖനം വായിച്ചു. വര്ധിച്ചു വരുന്ന ലൗ ജിഹാദ് മതസൗഹാര്ദ്ദത്തെ തകര്ക്കുകയാണെന്നും ഐഎസ് ഭീകരസംഘടനയിലേക്ക് പോലും ക്രിസ്ത്യന് പെണ്കുട്ടികള് റിക്രൂട്ട് ചെയ്യപ്പെടുകയാണെന്നും ഇടയ ലേഖനത്തില് പറയുന്നു.
കേന്ദ്ര സര്ക്കാര് നിലപാടില് സഭയുടെ വാദം പൊളിയുന്നു
കേരളത്തില് ലൗ ജിഹാദ് ഇല്ലെന്ന കേന്ദ്ര സര്ക്കാരിന്റെ നിലപാടില് സീറോ മലബാര് സഭയുടെ വാദം പൊളിയുന്നു. സംസ്ഥാനത്ത് ലൗ ജിഹാദ് ഇല്ലെന്ന് സര്ക്കാര് പറഞ്ഞിട്ടും സീറോ മലബാര് സഭ അതെല്ലാം പാടെ തള്ളുകയായിരുന്നു. ക്രിസ്ത്യന് പെണ്കുട്ടികളെ മുസ്ലീം മതത്തില്പ്പെട്ടവര് മതം മാറ്റിയതിനു ശേഷം വിവാഹം ചെയ്യുന്നുവെന്നാണ് സഭയുടെ വാദം.