അണക്കെട്ടുകള്‍ തുറന്നതില്‍ വീഴ്ചപറ്റിയിട്ടില്ല: മാത്യു ടി തോമസ്

തിരുവനന്തപുരം: മഴ രൂക്ഷമായതിനെ തുടര്‍ന്ന് സംസ്ഥാനത്തെ അണക്കെട്ടുകള്‍ തുറന്നതില്‍ സര്‍ക്കാരിന് വീഴ്ച പറ്റിയിട്ടില്ലെന്ന് ജലവിഭവ മന്ത്രി മാത്യു ടി തോമസ്. സര്‍ക്കാര്‍ സൃഷ്ടിയാണ് പ്രളയം എന്നൊക്കെ പറയുന്നത് ദൗര്‍ഭാഗ്യകരമാണെന്നും മന്ത്രി പറഞ്ഞു.

കേന്ദ്ര കാലാവസ്ഥാ നിരീക്ഷണ കേന്ദ്രം കേരളത്തില്‍ അതി തീവ്ര മഴ പ്രവചിച്ചിരുന്നില്ല. പ്രളയത്തെപറ്റി മുഖ്യമന്ത്രിയും മന്ത്രിമാരും നിയമസഭയില്‍ വ്യക്തമാക്കിയ കാര്യങ്ങള്‍ ശരിയാണെന്ന് തെളിയിക്കുന്നതാണ് കേന്ദ്ര ജല കമ്മീഷന്‍റെ റിപ്പോര്‍ട്ടെന്നും മന്ത്രി വ്യക്തമാക്കി.

അണക്കെട്ടുകള്‍ ഒരുമിച്ച് തുറന്നതാണ് പ്രളയത്തിനു കാരണമായതെന്നത് വസ്തുതാവിരുദ്ധമാണ്. ഒാരോ അണക്കെട്ടുകള്‍ വ്യത്യസ്തസമയത്താണ് തുറന്നത്. കൃത്യമായ മുന്നറിയിപ്പുകള്‍ക്കുശേഷമാണ് ഡാമുകള്‍ തുറന്നതെന്നും മന്ത്രി ചൂണ്ടിക്കാട്ടി.

പ്രളയവുമായി ബന്ധപ്പെട്ട കാര്യങ്ങള്‍ വിശദീകരിക്കാന്‍ നടത്തിയ വാര്‍ത്താ സമ്മേളനത്തിലാണ് മന്ത്രി ഇക്കാര്യം പറഞ്ഞത്. മന്ത്രി എംഎം മണിയും വാര്‍ത്താ സമ്മേളനത്തില്‍ പങ്കെടുത്തു.