ജിഷ വധം: സിബിഐ അന്വേഷണം വേണ്ടെന്ന് ഹൈക്കോടതി

കൊച്ചി: പെരുമ്പാവൂരിൽ നിയമ വിദ്യാർഥി ജിഷ മരിച്ച കേസിൽ സിബിഐ അന്വേഷണം ആവശ്യമില്ലെന്ന് ഹൈക്കോടതി. നിലവിൽ കേസ് സിബിഐ അന്വേഷിക്കേണ്ട സാഹചര്യമില്ല. മുതിർന്ന ഐപിഎസ് ഉദ്യോഗസ്ഥയുടെ നേതൃത്വത്തിൽ അന്വേഷണം പുരോഗമിക്കുകയാണ്. ഈ സാഹചര്യത്തിൽ അന്വേഷണം സിബിഐയ്ക്ക് വിടേണ്ട കാര്യമില്ല. പോസ്റ്റ് മോർട്ടം റിപ്പോർട്ട് കക്ഷികൾക്ക് നൽകേണ്ടതില്ലെന്നും കോടതി വ്യക്തമാക്കി. മരിച്ചാലും ഇരയുടെ സ്വകാര്യത നിലനിൽക്കുമെന്നും കോടതി വ്യക്തമാക്കി. ഇരയുടെ പേര് മാധ്യമങ്ങളിൽ വരുന്നത് ദൗർഭാഗ്യകരമെന്നും കോടതി നിരീക്ഷിച്ചു.

അതേസമയം ജിഷ വധക്കേസിലെ അന്വേഷണ പുരോഗതി റിപ്പോ‍ർട്ട് ഹൈക്കോടതിയിൽ സമർപ്പിച്ചു. കേസന്വേഷണത്തിൽ വീഴ്ച പറ്റിയിട്ടില്ലെന്ന് റിപ്പോർട്ട് പറയുന്നു. ഐജി മഹിപാൽ യാദവാണ് റിപ്പോ‍ർട്ട് സമ‍പ്പിച്ചത്. ശരിയായ രീതിയിലാണ് അന്വേഷണം പുരോഗമിക്കുന്നത്. ജിഷയുടെ കൊലപാതകം അറിഞ്ഞ് 15 മിനിറ്റിനകം പോലീസ് സ്ഥലത്തെത്തിയിരുന്നു. മൃതദേഹം ദഹിപ്പിച്ചത് ബന്ധുക്കളുടെ ആവശ്യപ്രകാരമാണെന്നും റിപ്പോർട്ട് പറയുന്നു. മതാചാരപ്രകാരം ദഹിപ്പിക്കണമെന്നായിരുന്നു ബന്ധുക്കളുടെ ആവശ്യമെന്നും റിപ്പോർട്ട് ചൂണ്ടിക്കാട്ടുന്നു.