ഇടുക്കിയിൽ ട്രയല്‍ റണ്‍ ഉടന്‍ നടത്തേണ്ട സാഹചര്യമില്ലെന്ന് മന്ത്രി

ചെറുതോണി: ഇടുക്കി അണക്കെട്ടിൽ ജലനിരപ്പ് ഉയരുന്നുണ്ടെങ്കിലും നിലവിൽ ഉടൻ ട്രയല്‍ റണ്‍ നടത്തേണ്ട സാഹചര്യമില്ലെന്ന് മന്ത്രി മാത്യു ടി തോമസ്. സ്ഥിതിഗതികൾ വിലയിരുത്തിയ ശേഷം സംസാരിക്കുകയായിരുന്നു മന്ത്രി. ചൊവ്വാഴ്ച അഞ്ചു മണിക്ക് 2395.56 അടിയാണ് രേഖപ്പെടുത്തിയ ജലനിരപ്പ്. അണക്കെട്ടിൻെറ വൃഷ്ടി പ്രദേശത്ത് മഴ തുടരുകയാണ്.

2395.26 അടിയായിരുന്നു ഇന്ന് രാവിലത്തെ ജലനിരപ്പ്. 2397 അടിയായാല്‍ ഷട്ടറുകള്‍ തുറന്ന് ട്രയല്‍ റണ്‍ നടത്തേണ്ടി വരുമെന്ന് മന്ത്രി എം.എം.മണി അറിയിച്ചിരുന്നു. ജലനിരപ്പ് 2395 അടി പിന്നിട്ടതോടെ രണ്ടാമത്തെ ജാഗ്രതാ നിര്‍ദ്ദേശമായ ഓറഞ്ച് അലര്‍ട്ട് പ്രഖ്യാപിച്ചിരുന്നു.

ജനങ്ങള്‍ ആശങ്കപ്പെടേണ്ടതില്ലെന്നും എല്ലാം നിയന്ത്രണവിധേയമാണെന്നും അധികൃതര്‍ അറിയിച്ചു. ഡാമിന് സമീപം സുരക്ഷാ ക്രമീകരണങ്ങൾ ശക്തമാക്കിയിട്ടുണ്ട്.