അഭിമന്യു കൊലക്കേസ് പ്രതികള്‍ക്കെതിരെ യുഎപിഎ ഇല്ല

തിരുവനന്തപുരം: മഹാരാജാസ് കോളേജ് വിദ്യാര്‍ഥി അഭിമന്യു കൊല്ലപ്പെട്ട കേസിൽ പ്രതികളള്‍ക്കെതിരെ യുഎപിഎ ചുമത്തില്ലെന്ന് പോലീസ്. സിപിഎമ്മിന്‍റെ മുൻകാല രാഷ്ട്രീയനയങ്ങള്‍ കണക്കിലെടുക്കുമ്പോള്‍ തിരക്കിട്ട് യുഎപിഎ ചുമത്തേണ്ടെന്നായിരുന്നു സിപിഎമ്മിന്‍റെ തീരുമാനം. ഇതിനു പിന്നാലെ യുഎപിഎ ചുമത്താൻ മതിയായ തെളിവുകളില്ലെന്ന് പോലീസിന് ഡയറക്ടര്‍ ജനറൽ ഓഫ് പ്രോസിക്യൂഷനിൽ നിന്ന് നിയമോപദേശം ലഭിക്കുകയായിരുന്നു.

കേസ് എൻഐഎ ഏറ്റെടുക്കണമെന്ന് പോലീസ് ആവശ്യപ്പെട്ടിട്ടില്ലെങ്കിലും ഏജൻസി പ്രാഥമികവിവരങ്ങള്‍ ഇതിനോടകം ശേഖരിച്ചിട്ടുണ്ട്. എന്നാൽ കേസ് ഏറ്റെടുക്കാൻ എൻഐഎ മുന്നോട്ടുവന്നാൽ പോലീസ് എതിര്‍ക്കാനിടയില്ല.

ഇതിനിടെ പ്രതികള്‍ വിദേശത്തേയ്ക്ക് കടന്നെന്ന സൂചനയെത്തുടര്‍ന്ന് പോലീസ് അന്വേഷണത്തിനായി ഇന്‍റര്‍പോളിന്‍റെ സഹായം തേടിയിട്ടുണ്ട്. പ്രതികള്‍ക്കായി അയൽസംസ്ഥാനങ്ങളിലും അതത് പോലീസ് സേനകളുടെ സഹായത്തോടെ തെരച്ചിൽ നടത്തുന്നുണ്ട്.

മഹാരാജാസ് കോളേജിലെ വിദ്യാര്‍ഥിയായ മുഹമ്മദ് ഉള്‍പ്പെടെയുള്ള പ്രധാനപ്രതികള്‍ക്കായാണ് ഇപ്പോള്‍ തെരച്ചിൽ നടത്തുന്നത്.