ഒരു വോട്ട് പോലും ലഭിക്കാതെ ബിജെപി
സംസ്ഥാനത്തെ 318 ബൂത്തുകളിൽ ബിജെപിക്ക് ഒരു വോട്ട് പോലും നേടാനായില്ല. 70 മണ്ഡലങ്ങളിലെ 493 ബൂത്തുകളിൽ എൻഡിഎ സ്ഥാനാ‍ര്‍ത്ഥിക്ക് ലഭിച്ചത് ഒരു വോട്ട് മാത്രമാണ്, ആയിരത്തിലധികം ബൂത്തുകളിൽ എൻഡിഎ സ്ഥാനാ‍ര്‍ത്ഥിക്ക് ലഭിച്ചതാകട്ടെ രണ്ട് മുതൽ അഞ്ച് വോട്ടുകൾ മാത്രവും. തെരഞ്ഞെടുപ്പ് കമ്മീഷൻ പുറത്തുവിട്ട കണക്കുകളെ വിശകലനം ചെയ്താണ് മനോരമ ഓൺലൈൻ റിപ്പോ‍‍ര്‍ട്ട് പുറത്തുവിട്ടിരിക്കുന്നത്. ഹെലികോപ്റ്റ‍ര്‍ വാടകയ്ക്കെടുത്തും കേന്ദ്ര നേതാക്കൾ വന്നും നടത്തിയ തെരഞ്ഞെടുപ്പ് പ്രചാരണം ഫലം കണ്ടില്ലെന്നാണ് ഈ കണക്ക് വ്യക്തമാക്കുന്നത്.
വോട്ടില്ലാ ബൂത്തുകൾ ഏറ്റവും അധികം മലപ്പുറത്ത്
ഒരു വോട്ട് പോലും ലഭിക്കാത്ത ഏറ്റവും അധികം ബൂത്തുകളുള്ളത് മലപ്പുറം ജില്ലയിലാണ് മലപ്പുറം ജില്ലയിലെ പൊന്നാനിയിൽ 34 ബൂത്തുകളിൽ ഒരു വോട്ട് പോലും കിട്ടിയില്ല. 16 ബൂത്തുകളിൽ ഒരു വോട്ട് മാത്രമാണ് ലഭിച്ചത്. 15 മണ്ഡലങ്ങളിലും ഒറ്റ വോട്ട് ബൂത്തുകളും വോട്ടില്ലാ ബൂത്തുകളുമുണ്ട്. നിലമ്പൂ‍ര്‍ മണ്ഡലത്തിൽ മാത്രമാണ് വ്യത്യാസം. എന്നാൽ ബിജെപിയുടെ മിന്നും സ്ഥാനാ‍ര്‍ത്ഥികൾ മത്സരിച്ച മണ്ഡലങ്ങളിലൊന്നും ഇത്തരം ബൂത്തുകളില്ലെന്നതാണ് ബിജെപിക്ക് ആശ്വാസം നൽകുന്നത്.
പൂജ്യം കിട്ടിയ പ്രമുഖ‍‍ര്‍
ബിജെപി സംസ്ഥാന അധ്യക്ഷൻ കെ സുരേന്ദ്രൻ മത്സരിച്ച രണ്ടാം മണ്ഡലമായ കോന്നിയിലെ രണ്ട് ബൂത്തുകളിൽ പൂജ്യം വോട്ടുകളാണ് ലഭിച്ചത്. നടൻ കൃഷ്ണകുമാ‍‍ര്‍ മത്സരിച്ച തിരുവനന്തപുരത്തെ എട്ട് ബൂത്തുകളിൽ ഒരു വോട്ടുപോലുമില്ല. അഞ്ച് ബൂത്തുകളിൽ ഒരു വോട്ട് മാത്രമാണ് കൃഷ്ണകുമാറിന് നേടാനായത്. എംടി രമേശ് മത്സരിച്ച കോഴിക്കോട് നോ‍ര്‍ത്തിലെ ഒരു ബൂത്തിൽ അദ്ദേഹത്തിന് ആരും വോട്ട് ചെയ്തില്ല. കാസ‍ര്‍ഗോഡ് മണ്ഡലത്തിൽ 10 ബൂത്തുകളിൽ ഒന്നും ലഭിച്ചില്ല. മൂന്നിടത്ത് ഓരോ വോട്ടുകളാണ് ലഭിച്ചത്. കുണ്ടറ മണ്ഡലത്തിൽ എട്ട് ബൂത്തുകളിൽ ഒരു വോട്ട് പോലുമില്ല. എട്ടിടത്ത് ഓരോ വോട്ട് മാത്രം ലഭിച്ചു. ഇങ്ങനെ പോകുന്നു കണക്ക്.