വ്യാജരേഖ ചമച്ച് അവധിയെടുത്തു: സെൻകുമാറിനെതിരെ കേസ്

തിരുവനന്തപുരം: അവധി ആനുകൂല്യം നേടിയെടുക്കാൻ വ്യാജരേഖ നൽകിയെന്ന പരാതിയിൽ മുൻ ഡിജിപി സെൻകുമാറിനെതിരെ പോലീസ് കേസെടുത്തു. തിരുവനന്തപുരം മ്യൂസിയം പൊലീസാണ് കേസെടുത്തത്. കന്‍റോണ്‍മെന്‍റ് അസിസ്റ്റന്‍റ് കമ്മീഷണര്‍ക്കാണ് അന്വേഷണ ചുമതല.

കോർപ്പറേഷനിലെ മുൻ കൗൺസിലർ എ.ജെ.സുക്കാര്‍നോ നൽകിയ കേസിലാണ് പോലീസ് നടപടി സ്വീകരിച്ചിരിക്കുന്നത്. അവധിയെടുത്ത എട്ട് മാസക്കാലത്തോളം മുഴുവൻ ആനുകൂല്യങ്ങളും ലഭിക്കുന്നതിന് വ്യാജരേഖ ചമച്ചുവെന്ന വിജിലൻസ് റിപ്പോർട്ട് അടിസ്ഥാനമാക്കി കേസ് എടുത്ത് അന്വേഷിക്കാൻ ചീഫ് സെക്രട്ടറി നളിനി നെറ്റോ നിർദേശം നൽകിയിരുന്നു. ജാമ്യമില്ലാ വകുപ്പുകൾ ചേർത്താണ് കേസെടുത്തിരിക്കുന്നത്.

സംസ്ഥാന പൊലീസ് മേധാവി സ്ഥാനത്തു നിന്നു നീക്കം ചെയ്തതിനെ തുടർന്നു 2016 ജൂൺ ഒന്നു മുതൽ 2017 ജനുവരി 31 വരെ സെൻകുമാർ വ്യക്തിപരമായ ആവശ്യങ്ങൾക്കെന്ന പേരിൽ അവധിയിലായിരുന്നു.
ഗവ.ആയുർവേദ കോളജിലെ ഡോ.വി.കെ.അജിത് കുമാർ നൽകിയ എട്ട് മെഡിക്കൽ സർട്ടിഫിക്കറ്റും ഫിറ്റ്നസ് സർട്ടിഫിക്കറ്റും ഒപ്പം ഹാജരാക്കി. എന്നാൽ, ഒപി ടിക്കറ്റിലെ തീയതികളും സെൻകുമാറിനെ പരിശോധിച്ച തീയതികളും ഒന്നല്ല. ആയുർവേദ കോളജ് റജിസ്റ്ററിൽ ഇവ രേഖപ്പെടുത്തിയില്ല. ഒരു മെഡിക്കൽ സർട്ടിഫിക്കറ്റ് ഞായറാഴ്ചയാണു നൽകിയത്.

Non bailable case against Senkumar

For providing fake documents and procuring full salary during leave, case registered against Senkumar.