കെ.സുരേന്ദ്രനെതിരെ വീണ്ടും ജാമ്യമില്ലാ വകുപ്പ് പ്രകാരം കേസ്

പത്തനംതിട്ട: ബിജെപി സംസ്ഥാന നേതാവ് കെ.സുരേന്ദ്രനെതിരെ ജാമ്യമില്ലാ വകുപ്പുകൾ ചുമത്തി വീണ്ടും കേസ്. ശബരിമലയിൽ സംഘർഷമുണ്ടാക്കാൻ ശ്രമിച്ചുവെന്ന് ആരോപിച്ച് നിലക്കൽ നിന്ന് അറസ്റ്റിലായ കെ.സുരേന്ദ്രൻ കൊട്ടാരക്ക സബ് ജയിലിൽ കഴിയുകയായിരുന്നു. പത്തനംതിട്ട കോടതി ജാമ്യം അനുവദിച്ചെങ്കിലും കണ്ണൂരിൽ പോലീസിനെതിരെ പ്രകോപനപരമായി പ്രവർത്തിച്ചതിന് അറസ്റ്റ് വാറണ്ട് പുറപ്പെടുവിച്ചതിനാൽ സുരേന്ദ്രന് ജയിൽ മോചിതനാകാൻ കഴിഞ്ഞില്ല.

കെ.സുരേന്ദ്രനെ കൂടാതെ ബിജെപി നേതാവ് വി.വി രാജേഷ്, യുവമോർച്ച സംസ്ഥാന പ്രസിഡന്റ് പ്രകാശ് ബാബു, ആർഎസ്എസ് നേതാവ് വത്സൻ തില്ലങ്കേരി എന്നിവർക്കെതിരെയും കേസെടുത്തു. ചിത്തിര ആട്ടവിശേഷ സമയത്ത് ഇവരും സന്നിധാനത്ത് ഉണ്ടായിരുന്നു. ചിത്തിര ആട്ടവിശേഷത്തിന് നട തുറന്നപ്പോൾ 52 വയസുകാരിയെ സന്നിധാനത്ത് തടഞ്ഞ സംഭവത്തിൽ ഗൂഢാലോചന നടത്തിയെന്നാണ് സുരേന്ദ്രനെതിരെ ഇപ്പോഴുള്ള കേസ്. പൊലീസിന് സുരേന്ദ്രനെതിരെ തെളിവുകൾ ലഭിച്ചിട്ടുണ്ടെന്നാണ് സൂചന. ഐപിസി 120(ബി) വകുപ്പ് അനുസരിച്ച് ജാമ്യമില്ലാ കേസാണ് സുരേന്ദ്രനു മേൽ ചുമത്തിയിരിക്കുന്നത്.