'ജനം അസ്വസ്ഥരാണ്'; ജനാധിപത്യം പുനഃസ്ഥാപിക്കുന്ന ഫലം ഉണ്ടാകണം; തെരഞ്ഞെടുപ്പ് ദിനത്തിൽ സുകുമാരൻ നായർ

കോട്ടയം: സംസ്ഥാനത്ത് രണ്ടാം ഘട്ട തദ്ദേശ തെരഞ്ഞെടുപ്പ് നടക്കവെ പ്രതികരണവുമായി എൻഎസ്എസ് ജനറൽ സെക്രട്ടറി സുകുമാരൻ നായർ. ജനാധിപത്യം പുനഃസ്ഥാപിക്കുന്ന ഫലമാണ് ഇത്തവണ ഉണ്ടാകേണ്ടതെന്ന് അദ്ദേഹം പറഞ്ഞതായി മാതൃഭൂമി ന്യൂസാണ് റിപ്പോർട്ട് ചെയ്തത്. വാഴപ്പള്ളി സെന്റ്. തെരേസാസ് സ്‌കൂളിലെ ബൂത്തില്‍ വോട്ട് രേഖപ്പെടുത്തിയ ശേഷമാണ് സുകുമാരൻ നായരുടെ പ്രതികരണം.

'വസ്തുതകള്‍ മനസ്സിലാക്കി ജനങ്ങള്‍ വോട്ട് ചെയ്യും. ജനങ്ങള്‍ അസ്വസ്ഥരാണ്. അതുകൊണ്ട് തന്നെ ഈ തെരഞ്ഞെടുപ്പ് ജനാധിപത്യത്തിന്‍റെ വിജയമാകണം,' സുകുമാരന്‍ നായര്‍ പറഞ്ഞു. അതേസമയം മുന്നണികളോട് സമദൂര നിലപാടാണ് എന്‍എസ്എസിനുള്ളതെന്നും അദ്ദേഹം വ്യക്തമാക്കി.

Also Read : സി.എം. രവീന്ദ്രന്റെ ജീവന്‍ അപകടത്തിലെന്ന് മുല്ലപ്പള്ളി; രവീന്ദ്രന് കൊവിഡ് അനന്തര ചികിത്സയിലെന്ന് കടകംപള്ളി

അതേസമയം മതേതരത്വം ആഗ്രഹിക്കുന്ന വോട്ടര്‍മാര്‍ എല്‍ഡിഎഫിനൊപ്പമാണെന്നാണ് വോട്ട് രേഖപ്പെടുത്തിയ ശേഷം മന്ത്രി എസി മൊയ്തീൻ പ്രതികരിച്ചത്. എൽഡിഎഫിന് മികച്ച ഭൂരിപക്ഷം ലഭിക്കുമെന്നും കോര്‍പ്പറേറ്റുകളും മാധ്യമങ്ങളും സൃഷ്ടിച്ച വിവാദങ്ങള്‍ ജനങ്ങളെ സ്വാധീനിക്കില്ലെന്നും മന്ത്രി പറഞ്ഞു.

തെരഞ്ഞെടുപ്പില്‍ മികച്ച ഭൂരിപക്ഷത്തോടെ ഇടതുപക്ഷം വിജയിക്കുമെന്നായിരുന്നു വിദ്യാഭ്യാസമന്ത്രി സി രവീന്ദ്രനാഥിന്‍റെ പ്രതികരണം. സംസ്ഥാന സര്‍ക്കാര്‍ എന്താണ് ചെയ്തത് എന്ന് കേരളത്തിലെ എല്ലാ ജില്ലകളിലും ഉള്ളവര്‍ക്ക് അറിയാമെന്നും അത് എൽഡിഎഫിന് മുതൽകൂട്ടണെന്നും അദ്ദേഹം കൂട്ടിച്ചേര്‍ത്തു.

Also Read: മതേതരത്വം ആഗ്രഹിക്കുന്ന വോട്ടര്‍മാര്‍ എല്‍ഡിഎഫിനൊപ്പം, മികച്ച ഭൂരിപക്ഷത്തോടെ വിജയിക്കും; പ്രതികരണവുമായി മന്ത്രിമാര്‍

തദ്ദേശ സ്ഥാപനങ്ങളിലേക്കുള്ള രണ്ടാം ഘട്ട തെരഞ്ഞെടുപ്പില്‍ കോട്ടയം, എറണാകുളം, തൃശൂര്‍, പാലക്കാട്, വയനാട് ജില്ലകളിലെ വോട്ടര്‍മാരാണ് വിധിയെഴുതുന്നത്.