ശബരിമല നിലപാടില്‍ മാറ്റം വരുത്തില്ല, വേണ്ടി വന്നാല്‍ കേന്ദ്രത്തെ സമീപിക്കും: ജി.സുകുമാരന്‍ നായര്‍

ചങ്ങനാശ്ശേരി: ശബരിമല യുവതീ പ്രവേശന വിഷയത്തില്‍ എന്‍എസ്എസിന്‍റെ നിലപാടിന്‍ മാറ്റം വരുത്തില്ലെന്ന് എന്‍എസ്എസ് ജനറല്‍ സെക്രട്ടറി സുകുമാരന്‍ നായര്‍. ഇതിനായി വേണ്ടിവന്നാല്‍ കേന്ദ്ര സര്‍ക്കാരിനെ സമീപിക്കുമെന്നും സുകുമാരന്‍ നായര്‍ വ്യക്തമാക്കി.

ക്ഷേത്രങ്ങളിലെ വിശ്വാസങ്ങളും ആചാരങ്ങളും സംരക്ഷിക്കുകയും നിലനിര്‍ത്തുകയുമാണ് എന്‍എസ്എസിന്‍റെ നിലപാട്. ഇതിനായി നിഷ്‍പക്ഷമായാണ് എന്‍എസ്എസ് നിലകൊണ്ടത്. ഈ വിഷയത്തില്‍ എന്‍.എസ്.എസിനെ ഒരു രാഷ്ട്രീയ പാര്‍ട്ടിയും ഏറ്റെടുത്തിട്ടില്ലെന്നും സുകുമാരന്‍ നായര്‍
ചൂണ്ടിക്കാട്ടി.

വിശ്വാസികളെ മനസിലാക്കാന്‍ കഴിയാത്ത സര്‍ക്കാരാണോ കേരളത്തില്‍ ഭരിക്കുന്നത്. ശബരിമലയില്‍ യുവതികള്‍ കയറാനെത്തിയപ്പോള്‍ വിശ്വാസികളായ യുവതികളുടെ ചങ്കിടിപ്പ് വര്‍ധിക്കുകയായിരുന്നു. സര്‍ക്കാര്‍ വേണ്ടത് ആലോചിച്ചു ചെയ്യണമെന്നും സുകുമാരന്‍ നായര്‍ ആവശ്യപ്പെട്ടു.