പള്ളിപ്പുറത്ത് എന്‍എസ്‌എസ് ഓഫീസ് ആക്രമിച്ചു

ആലപ്പുഴ : ആലപ്പുഴ ചേര്‍ത്തല പള്ളിപ്പുറത്ത് എന്‍എസ്‌എസ് ഓഫീസ് ആക്രമിച്ചു. 801ാം നമ്പര്‍ എന്‍എസ്‌എസ് കരയോഗത്തിന് നേരെയായിരുന്ന ആക്രമണം. ആക്രമണത്തെ തുടര്‍ന്ന് ഓഫീസിന് മുന്നിലുണ്ടായിരുന്ന കൊടിമരം പൂര്‍ണമായും നശിപ്പിച്ചു. പുലര്‍ച്ചെയാണ് അപകടമുണ്ടായ വിവരം നാട്ടുകാര്‍ അറിഞ്ഞത്. തുടര്‍ന്ന് എന്‍എസ്എസ് ഭാരവാഹികളെ വിവരം അറിയിക്കുകയായിരുന്നു. ഭാരവാഹികള്‍ പോലീസില്‍ പരാതി നൽകിയിട്ടുണ്ട്.

കഴിഞ്ഞ ദിവസങ്ങളിലായി സംസ്ഥാനത്തെ വിവിധ എന്‍എസ്‌എസിന്‍റെ ഓഫീസുകള്‍ക്ക് നേരെ നിരന്തരം ആക്രമണം നടക്കുന്നുണ്ട്. തിരുവനന്തപുരത്തും ആലപ്പുഴയിലും കോട്ടയത്തുമുള്ള എന്‍എസ്‌എസ് മന്ദിരങ്ങള്‍ക്ക് നേരെയും ആക്രമണം ഉണ്ടായിരുന്നു. ഇന്നലെ കൊട്ടാരക്കരയിലെ എന്‍എസ്എസ് കരയോഗ മന്ദിരത്തിന് നേര്‍ക്ക് ആക്രമണം നടന്നിരുന്നു. പൊലീക്കോട് ശ്രീ മഹാദേവര്‍ വിലാസം കരയോഗ മന്ദിരത്തിന് നേരെയായിരുന്നു ആക്രമണം. മന്ദിരത്തിന് മുന്നില്‍ സ്ഥാപിച്ചിരുന്ന കൊടിമരം അക്രമികള്‍ പിഴുതെറിഞ്ഞ നിലയിലായിരുന്നു.

അതേസമയം ആലപ്പുഴയിലെ നൂറനാട്, കുടശിനാട് എന്‍എസ്‌എസ് കരയോഗ മന്ദിരത്തില്‍ കരിങ്കൊടി കെട്ടുകയും ജനറല്‍ സെക്രട്ടറി ജി സുകുമാരന്‍ നായര്‍ക്ക് അനുശോചനമറിയിച്ച്‌ റീത്ത് വക്കുകയും ചെയ്തിരുന്നു. കൊടശിനാട് എന്‍എസ്എസ് ഹൈസ്‌കൂളിലും സമാനമായി കൊടിയുയര്‍ത്തി റീത്ത് വച്ചിരുന്നു.

ശബരിമല യുവതി പ്രവേശനത്തില്‍ ശക്തമായ നിലപാട് സ്വീകരിച്ചതിന് പിന്നാലെയാണ് എന്‍എസ്എസ് കരയോഗമന്ദിരങ്ങള്‍ക്ക് നേരെ നിരന്തരം ആക്രമണങ്ങൾ ഉണ്ടാകുന്നത്.

കൂടാതെ തിരുവനന്തപുരം പാപ്പനംകോടിന് സമീപം മേലാംകോട് എന്‍എസ്എസ് കരയോഗ മന്ദിരം ആക്രമിക്കുകയും ചട്ടമ്പി സ്വാമി സ്മൃതി മണ്ഡപത്തിൻ്റെ ചില്ലുകള്‍ തകര്‍ക്കുകയും ചെയ്തിരുന്നു. നവംബര്‍ രണ്ടിന് രാത്രി പതിനൊന്ന് മണിയോടെയാണ് ഇവിടെ ആക്രമണമുണ്ടായത്.

എന്‍എസ്എസ് ഓഫീസിൻ്റെ മുകള്‍ നിലയിലെ പ്രതിമയുടെ മുന്നിലെ ഗ്ലാസ് എറിഞ്ഞ് തകര്‍ത്ത നിലയിലായിരുന്നു. അന്നും പ്രതിമയ്ക്ക് സമീപം എന്‍എസ്എസിനെ വിമര്‍ശിച്ചു കൊണ്ടുള്ള റീത്തുണ്ടായിരുന്നു. സംഭവത്തില്‍ പോലീസിൻ്റെ അന്വേഷണം പുരോഗമിക്കുകയാണ്.