ജലന്ധര്‍ ബിഷപ്പ് കേസ്: കന്യാസ്ത്രീയെ വധിക്കാന്‍ ശ്രമം

കോട്ടയം: ജലന്ധര്‍ ബിഷപ്പിനെതിരെ ബലാത്സംഗ പരാതി നല്‍കിയ കന്യാസ്ത്രീയെ വധിക്കാന്‍ ശ്രമമുണ്ടായെന്ന് പരാതി. കന്യാസ്ത്രീ കുറവിലങ്ങാട് പോലീസ് സ്‌റ്റേഷനിലാണ് പരാതി നല്‍കിയത്. താന്‍ സഞ്ചരിച്ചുകൊണ്ടിരുന്ന കാറിന്റെ ബ്രേക്ക് ഊരിമാറ്റാന്‍ ശ്രമമുണ്ടായെന്നാണ് കന്യാസ്ത്രീ പരാതിയില്‍ പറയുന്നത്.

കന്യാസ്ത്രീയുടെ മഠത്തില്‍ ഒരു അന്യസംസ്ഥാന തൊഴിലാളി ജോലിയെടുക്കുന്നുണ്ടെന്നും ഇയാളോട് ബിഷപ്പിന്റെ സഹായിയായ ലോറന്‍സിന്റെ സഹോദരന്‍ കന്യാസ്ത്രീയുടെ യാത്രകളുടെ വിവരങ്ങള്‍ ചോദിച്ചുവെന്നും പരാതിയില്‍ പറഞ്ഞിട്ടുണ്ട്. സഞ്ചരിക്കുന്ന കാറിന്റെ ബ്രേക്ക് ഊരിമാറ്റാന്‍ പറ്റുമോയെന്ന് അന്വേഷിച്ചുവെന്നും കന്യാസ്ത്രീ പറഞ്ഞു. സഹോദരന്‍ ഫോണില്‍ വിളിച്ചാണ് ഇക്കാര്യം തിരക്കിയതെന്നും പരാതിയില്‍ വ്യക്തമാക്കുന്നുണ്ട്. പരാതിയെത്തുടര്‍ന്ന് പോലീസ് അന്വേഷണം ആരംഭിച്ചു.